Dem durchlauchtenn, hochgebornen fursten und herren, herrn Albrechtenn, vonn Gottes gnadenn marggraven zu Brandenburg, in Preussen, / zu Stettin, / Pommern, / der Cassuben und Wendenn hertzogk, / burggraff zu Nurnbergk unnd furst zcu Rügenn, / unnserem hochgunstigenn lieben herren unnd freunde

Durchlauchter, hochgeborner furst, / hochgunstiger, lieber herr unnd freunndt. / Unnsere freuntliche unnd vleisswillige dinste zuvoran. /

Es hat unns des erbarn unnd ernvhesten Berndt von Conseck freundtschafft ersucht, / unnd angeczeigt / wie ehr etwan einenn aufstos / mit Euer Furstlichen Durchlaucht amptman zu Shestenn, / deshalben gedachter Conseck bey dersulben angegeben, / gehabt / unnd derwegenn dieweil ehr Ewer Furstliche Durchlaucht gross ungenade gespuret, / ihr furstenthum reumenn mussen, / unns darum fleissiglich durch sein freuntschafft bittenn lassenn, / wir in ein zceitlang bass zu austrag der sachenn inn unnserm bistum geleitenn woltenn. / Weyl wir aber nicht gerne die jhenigenn die Ewer Furstlichen Durchlaucht widdrig seinn, / bey unns inn unnserm geleit vorhalten, / wie wir den wissenn, / das die sich auch gleichsfals kegen unns thut erzceigenn. / Unnd dennoch aus der sachenn grunde, / die unns gemelte freuntschafft weitlefig vorbracht, / vorstanndenn, / das man Ewer Furstlichen Durchlaucht mit der vorclage / viel zu milde berichtet. / Unnd den gutten man bey dersulbenn angegebenn, / habenn wir im unnser geleit, / auf das ehr sich nicht an eynen andern orth begebe, / ein monat lang zugesaget, / sunnderlich auch dieweil ehr die zceit, / damit ehr sich vorantwortten muge, vonn unns gebetenn. /

Auff das ehr aber ane hinderunng zu solcher voranthwortung bey Ewer Furstlichen Durchlaucht kommen muge, / bittenn wir freunntlich, die wolte inn auch auff einn monat ihr frey unnd sicher geleite zuschicken, / unnd inn alsdann genediglich horenn, / unnd zu voriger Ewer Furstlichen Durchlaucht genadenn kommen lassenn. /

Das die freuntschafft nebenn ihm unnd unns idere zceit williglich umb Ewer Furstliche Durchlaucht werden vorschulden / unnd vordienenn, / die wir hiemit götlichenn genadenn mit langweriger gesunndtheit, / guttem unnd geluckseligem regiment bevelenn. /

Datum Heilsberg, denn andern thag Iulii M D XLVIII.

Ioannes vonn Gots gnaden bischoff zu Ermelanndth