Reverendissimo in Christo Patri et Domino, domino Ioanni Dantisco, Dei gratia episcopo Culmensi ac ecclesiae Pomesaniensis administratori, domino suo observandissimo

Reverendissime in Christo Pater et Domine, domine observandissime.

Servitiorum meorum commendatione praemissa.

Exspecto responsum ad priores litteras per scribam Schvecensem transmissas et quando Reverendissima Dominatio Vestra velit nuntium expedire ad maiestatem regiam et quid censet consulendum maiestati regiae, an conventio nova sit instituenda, ut unanimes simus in votis nostris. Undique imminebit nobis difficultas. Si conventio instituenda erit, tunc credo esset consultum, quod cogitaremus de gravamine, quo terrigenae tenentur, de servis et rusticis fugitivis, de nimia mercede, item de mechanicis, qui nimis care dant etc.

Etiam an responsum Gdani datum sub utrorumque nomine scribendum sit, quod mihi videretur competentius, vel an Reverendissima Dominatio Vestra sola per se scribere velit. Similiter etiam de consultando, an conventio foret conscribenda.

Cum his me Reverendissimae Dominationi Vestrae unice commendo. Quam felicissime in multos annos valere cupio.

Ex Meva Dominica vocem iucunditatis anno virginei partus 1535.

Eiusdem Reverendissimae Dominationis Vestrae obsequentissimus Georgius a Basen etc. Mevensis capitaneus scripsit