Letter #2985
Stanisław HOZJUSZ (HOSIUS) to Ioannes DANTISCUSCracow, 1546-07-16
| received Guttstadt (Dobre Miasto), 1546-07-24 Manuscript sources:
Prints:
| ||||||
Text & apparatus & commentaryPlain textText & commentaryText & apparatus
AAWO, AB, D. 19, No62_2Reverendissimo in Christo Patri et Domino, domino Ioanni Dei gratia episcopo Varmiensi, domino colendissimo
AAWO, AB, D. 19, No62_1Reverendissime in Christo Pater et Domine, domine colendissime.
Officiosissimam servitutis meae commendationem.
Alexandri causa iam est absoluta proculdubio. Quae in quo statu sit, ex fasciculo litterarum, quem nepos mittit, Reverendissima Dominatio Vestra cognoscet. Utinam autem in ecclesia ei locus non sit! Verum non deerunt patroni, qui pedibus et manibus pro eo contendent.
Melchior Adler bis hic fuit, sed a me visus non est. Apud dominum Soboczki frequens fuisse dicitur. Quid egerit, num quid obtinuerit, nescio. De iureiurando per eum praestito nihil a quoquam praeter id, quod scripsit Reverendissima Dominatio Vestra, cognovi.
De eo, qui cepit filium domini Eggerdi, cupivissem uberius aliquid cognoscere, nam hactenus certi scio nihil, nisi quantum brevibus perstrinxit Reverendissima Dominatio Vestra. De Donato scripsit Hartowski diplomata.
Paradoxon quiddam accidit, nam reginalis maiestatis beneficio Camienecensis episcopus est renuntiatus doctor Leonhardus, qui fuit in ecclesia cathedrali a sacris contionibus, non omnino vacuus a suspicione novitatis. Faxit Deus, ut res cedat feliciter.
Gedanenses quid sua praepropera legatione profecturi sint, videbimus. Sera gratulatio reprehendi non solet. Cetera per Psitacum scripsi.
Deum precor, ut Reverendissimam Dominationem Vestram diu servet incolumem et felicem.
Cuius me gratiae commendo.
Cracoviae, 17 Calendas Augusti 1546.
Eiusdem Reverendissimae Dominationis Vestrae servitor deditissimus Stanislaus Hosius cantor et canonicus Cracoviensis(!)