Reverendissimo in Christo Patri et Domino, domino Ioanni Dei gratia episcopo Warmiensi domino suo gratioso ac clementissimo

Reverendissime in Christo Pater et Domine, domine gratiose ac clementissime. Post humillimam servitiorum meorum exhibitionem.

Hodie circiter horam sextam mane Reverendissimae Paternitatis Vestrae accepi litteras, quibus me adhortatur impendendam operam, ut litterae Reverendissimae Paternitatis Vestrae quantocius ad venerabilem dominum Theodericum perferantur, quas statim una cum litteris venerabilis capituli ac meis, cum venerabili domino Lemanno Reverendissimae Paternitatis Vestrae cancellario, qui vix infra triduum hinc absolvetur, Gdanum mittere, ad dominum Mathiam Cymerman, cuique litteras nostras venerabilis dominus custos summa commendavit diligentia. Litterae venerabilis capituli ac meae eandem formae continent sententiam, qualem Reverendissimae Paternitati Vestrae habent, addidi in meis litteris ac mentionem feci de pace unius anni nobis impetrata, de qua video ex litteris Reverendissimae Paternitati Vestrae eidem nondum cognitum esse.

Quae hic acta sunt et aguntur, venerabilis dominus Lemannus Reverendissimae Paternitati Vestrae exacte et ad unguem descripsit, qui hic praetermittit diligentiam nulla[m], quin non omni conatu intentus est ac describit, quae audiuntur ac prorogantur. Ad quem me refero. Quae attinent ad legationem regiam, fere omnes astipulantur votis Reverendissimae Paternitatis Vestrae excepto articulo uno, nec adhuc tamen ad IIII deliberatum est. Me Reverendissimae Paternitatis Vestrae gratiae totum ac quam humillime commendo, quam Deus Omnipotens nobis diu felicem ac incolumem conservare dignetur.

Datae Marienburg, die 13 Aprilis 1548.

Eiusdem Reverendissimae Paternitatis Vestrae deditissimus servitor Achatius a Trenka