BCz, 244, p. 326

Reverendissimo Domino Tidemanno Gise, electo Culmensi, fratri et amico carissimo et honoran(do) or honoran(dissimo)⌈honoran(do)honoran(do) or honoran(dissimo)⌉

BCz, 244, p. 323

Reverendissime Domine, frater et amice carissime ac honoran(de) or honoran(dissime)⌈honoran(de)honoran(de) or honoran(dissime)⌉. Salutem et fraterni amoris commendationem.

Scripsi superiori die Dominationi Vestrae Reverendissimae ex Allenstein, unde hic nudiusquartus applicui, et binas Dominationis Vestrae Reverendissimae a venerabili domino cantore accepi, iam enim dominus praepositus, cui Dominatio Vestra Reverendissima unas dederat, hinc abierat. Alteras, quas Dominatio Vestra Reverendissima pro Gaspare Holthusen scripsit, non gravate admisi, quandoquidem non est, quod vel debeam vel velim Dominationi Vestrae Reverendissimae negare. Paulopost, hoc est heri, frater meus Bernardus rebus commissis bene dispositis sospes rediit. Litterae cambii ad numerum pecuniarum nostrarum, quae adhuc habentur Thoroniae per Georgium Hegel, meis impensis per proprium nuntium equitem ad urbem, antequam frater meus relinqueret Cracoviam, iis condicionibus, ut inter nos conventum est, actutum missae sunt, eisdemque expensis nuntius eques usque huc ad me cum bullis et tota nostra expeditione ex urbe revertetur. Quod futurum spero circa principium mensis Februarii etc.

Quae in aula nostra et alias in novis habentur, Dominatio Vestra Reverendissima ex adiunctis intelliget, adeoque et ea, quae dominus Nibschicz decano rescripsit. Ceterum quae hic acta sunt venerabilis dominus cantor referet, de quibus et aliis in rem Dominationis Vestrae Reverendissimae facientibus hic coram latius. Cuius adventum fraterno animo exspecto. Ignoscat, quaeso, quod in praesens sim contractior occupatus in rei domesticae cura et ordine, qui, ut recte constituatur, non fit sine novi patrisfamilias difficultate et labore. Quod fortassis et brevi Dominatio Vestra Reverendissima experietur. Quam felicissime valere non secus atque me ipsum cupio.

Ex Heilsberg, XXII Decembris MDXXXVII.

Reverendissimae Dominationis Vestrae integerrimus frater Ioannes episcopus Culmensis, postulatus Varmiensis manu mea scripsi.