Dem Hochwirdigsten in Gott Furstenn unnd Herren, herren Ioanni vonn Gotts genaden bisschoff zcu Ermelandt, administrator zcu Pommeszan etc., unnserm genedigenn herrenn

Hochwirdigster inn Gott Furst, Genediger Her.

Ewer Furstliche Gnade seindt unnser ganncz willige und unvordrossene mith vleis entpholen. /

Genediger Furst unnd Herre.

Ewer Furstliche Gnade schrieffte an unns gesternn vor dato gelanget haben wir enthpfangen / unnd sampt bey gelegen furstliche durchlaucht inn Preusszen brieffe abeschriefft wolle vorleszenn unnd wes steyne furstlische durchlaucht derwegen an Ewer Furstliche Gnade, so woll des lannds ordenung halben unnd wer dem anhengigk als aus von wegen der schliessunge des treffs vorthstellen thut zcu gutter notturfft eingenemmen unnd zcweiffelln nicht. Es werde solch irer furstlichen gnaden bedenncken unnd anregen deme lannde unnd gemeiner wollfart zcum besten gescheen etc. Geben derwegen Ewer Gnaden szo vill den gunst des erbithenns als das furstliche durchlaucht ire geszanndten in den kunftig <e> n tag zcufragen gewogenn etc.

Diennstlich zcur anndtwurt unnd konnen vor unnszer person woll gestheen losszen, das Ewer Furstliche Gnade neben fursthlicher durchlaucht mit notturfftige der sachen anczeigung an die koniglicher maiestett, unnsern allergnedigsten herre, schrieben unnd was alszo ire koniglicher maiestett widderummbe dorauff in andtwort geben adder auch in den kunfftigen lanndtag werde gelangen lasszen. Deme wollen wir unns neben den andern herren rethen der gebuer gerne bekwemen. Szo vyll aber die lants ordenung dovon furstliche durchlaucht breythlauffigk meldet betriefft wirt men ausz den recesszen unnd anderer vir nottelunge. Szo das mol anno etc. 29 hievon gemacht woll erfynnden wes der halben gescheen ader auch noch gelegenheit zcu thuende szein will konnen auch deselbige landts ordenunge szo vill die auffs landt siche woll leiden das szie in ire masz unnd krafft gestalt werde wie wir unns des auch ehrmals haben vornemen losszen whorumb aber biszher disthuenth in szeine krafft mihr geganngen tragen wie nicht eigennthlich wisszen.

Welchs wir Ewer Furstliche Gnade auff ire gethanes schreiben zcur undt wurt nicht haben unangetzeigt losszen mogen.

Unnd thuen hiemit Ewer Furstliche Gnade Gothe lannge geszundt mit fleis befelen.

Datum Danncczik, den 19 Martii anno etc. 39.

Ewer Furstliche Gnade diennstwillige burgermeister und radtman der stadt Dannczigk