List #4787
Tiedemann GIESE do Ioannes DANTISCUSLöbau (Lubawa), 1545-01-31
| odebrano Heilsberg (Lidzbark Warmiński), 1545-02-02 Rękopiśmienne podstawy źródłowe:
Pomocnicze podstawy źródłowe:
| ||||||
Tekst + aparat krytyczny + komentarzZwykły tekstTekst + komentarzTekst + aparat krytyczny
Reverendissimo in Christo Patri et Domino, domino Ioanni Dei gratia episcopo Warmiensi, domino fratri et maiori plurimum observando
Reverendissime in Christo Pater et Domine, domine frater ac maior plurimum observande. Salutem et obsequiorum commendationem.
A magnifico domino palatino Pomeraniensi hodie acceptum responsum per illius puerum mitto. A ceteris dominis, palatino et castellano Culmensibus nihildum ad me pervenit. Mihi sententia nostra communis, in qua Elbingi convenimus, adhuc placet. Ubi omnium sententias Reverendissima Dominatio Vestra habuerit, dignetur, quod Elbingi institutum est, prosequi, ac ita moderari nostras deliberationes, ne quam indignationem maiestatis regiae incurramus. Esset fortasse non ab re, ut Gedanenses quoque d[i]em p[ro]rogari peterent, sed hoc illorum iudicio committendum. Oro, Reverendissima Dominatio Vestra exempla mihi mittere velit eorum, quae in communibus negotiis ex aula ad dominos consiliarios scripta sunt, ne qua parte me errare contingat. Cupio me amori Reverendissimae Dominationis Vestrae sedulo esse commendatum, quam et in diuturna sospitate felicem esse precor.
Datae Lubaviae, die ultima Ianuarii 1545.
Postscript:
Hodie Gedano acceptis litteris mihi scribitur, illustrissimum Carolum caesarem die XXVIII Decembris Gandavi adhuc decubuisse podagrae morbo retentum. Fieri pro eo supplicationes in omnibus circa templis, ne desit rei Christianae in institutis comitiis. Litteris, quas Reverendissima Dominatio Vestra ad aulam missura est, has meas ad doctorem Hosium, ut adiungat, precor.
Reverendissimae Dominationis Vestrae studiosus et obsequens Tidemannus episcopus Culmensis