GStA, PK, HBA, C 2, No 114, 2 unnumbered

Dem durchlauchten, hochgebornen furstenn(n) und herrn, herrn Albrechten, von Gots gnaden marggraff zcu Brandenburg, / in Preusn, zu Stetin(n), Pomern, der Cassuben und Wenden hertzog, burggraff zu Normberg und furst zcu Rugen(n), unserm hochgunstigen, lÿben herrn und freundt

GStA, PK, HBA, C 2, No 114, 1 unnumbered

Durchlauchter, hochgeborner furst, hochgunstiger, lieber her(r). / Mein willige, freuntliche dienst zu voran(n). /

Ich hab nicht mocht noch lossen, / Ew(e)r F(urstlichen) D(urchlauch)t mit dissem meynem(m) schreib(e)n zu besuchen / und do mit meiner zu gedencken E(wer) D(urchlauch)t zu erinneren, nemlich in dem, das ich hie E(wer) D(urchlauch)t gern(n) fruntlich und nuczlich heth wold dinen(n), / wie ich dan ouch etwan, wor es stelle und zceit hot gehabt, / gethon(n), ouch was mir muglich noch gern thun wil. / Es sein aber hie solche hendel vorhanden(n), / die wunderlich zu ghen. / Muss mich derweg(en) ouch in gemeynen des lands und meinen(n) eigenen sachen viler dinge enthalden(n) etc. Wie es hie zugheth, wirt E(wer) D(urchlauch)t disser E(wer) D(urchlauch)t hoff diner, Felix von(n) Alten(n), weitlofftig bericht(en). / Hirum(m)b wil ich mit vilem schreiben(n) dis mol E(wer) D(urchlauch)t nicht belast(en) bittend, E(wer) F(urstliche) D(urchlauch)t wolde mein hochgunstig(e)r, liber her und freundt sein und bleib(e)n, / in der gunst ich mich thue befelen(n). Got der almechtig gebe derselbt(e)n E(wer) D(urchlauch)t mit irer lib(e)n furstin und geslecht alles, das zur selen und leib / in langweriger gesuntheit und glukselig(en) regiment / gut ist.

Dat(um) Krako, XXII Ianuarii M D XXXVII.

Io(anne)s, colmischer bischoff etc. eigen hant