Ioannes.

Unsernn gnedigen grus zuvorann. Edler, gestrenger, liber, getrewerr. /

Wir habnn vonn wegenn ewrs leidts, / das auch ewrr tochter halbenn, / der Got die ewige rhwe gebe, / angekommenn und die uns auch ist lieb gewest, nicht klein mitleidenn. / Dieweil wir aber alle zu dem wege gehorenn, / wolt sie gotlicher barmherczigheit befelenn und gotlichem willenn ewrnn willenn undergebenn, / do bey ewer gemuet weiter nicht besveren, / ouch ewr togentsame hausfrau do hin weisenn, / das sie ir hercz zu fried stelle. / Got der almechtige hot die frome Iustine in dem alter zu sich gefurdert, / darin sie seliglich von hynnen ist geschidenn. / Wer wir nicht vorleczt an einemm fues ungeschickt gewesenn, / wir hetten sie vor irem tode / und euch mit ewrmm gemahel / / besucht und getröst, / das wir dennoch schrifftlich dis mol nicht habnn mugen noch lossenn, euch cristlich und aus sonderer gunst ermanende, / ewrr leidt ab zu thun und Gote zu ergebenn, / den ummb gedult zu bittnn etc.

Dissen beygelegtnn briff an hern thumprobst Plotowsken / werdet ir im schicken und antwurt lossen furdrenn. / Do nebnn wolt fleis habenn, / domit das jenige uns zugehorig, so vonn Danczk an euch gekomenn, / wol vorsorgt hie her gefurt werde. / Welchs wir zu wolgefelligem dienst wollnn an nemenn.

Datum aus unsermm slosse Heilsberg, / den IX May M D XXXIX.