Unsern fruntlichnn grues zuvorann. Edle, ehrnthafftige fraw, bsundre, gutte freundyn. /

Ewer wemuttig schreiben von wegen des edlenn hern Luks von Allen, houptman zu Roghausen, ewers ehegathen, naturlichen tode, / dem Got gnedig sey, / hab wir entfangen / und ist uns ewer mhue und trubseligheit herczlich leid. / Dieweil aber Got der almochtig eynemm idren sein czyl und zceit geseczt, / dar uber nymant treten kan, / sold ir ewernn willen in gotlichenn willen seczen, / euch weiter nicht betruben, dan Goth gebotenn, seinerr gotlichen macht al...heim stellenn, / den weg des fleisches zu ghen. / Ic[z]licher darnoch er geruffen wirt, / ist keynn uff erden ausgenomenn. / Hieummb wir euch veterlich ermhanenn und bittenn, / wold getrost sein. / Was wir aber in dem elend / wi... ir klug / euch zu gutte, nucz und hulffe werdenn wissen zuthun, / sold ir euch zu uns genczlich vorsehen, / das wir solchs unbesvert gernn zu thun sein geneigt. / Wollen ouch derwegen im korczen unsernn leiblichenn bruder euch zu besuchen und vonn unsernn wegen zu trostenn / schickenn, / der wirt euch anczegen, welche zceit wir an konigliche majestet zu sendenn gesindt. / Was wir dan euch werden mugen gut[es] und wolgefallens thun, seynn wir willig. / Hiemit Gothe dem almechtigen befholenn.

Datum aus unserm slosse Lobau, den XXIIII Ianuarii M D XXXVI.