Dem Hochwirdigsten in Got Fursten unde Herren, herren Ioanni / von Gotes genaden des loblichen stichts Ermelanth bisschove etc., unserm genedigen herrenn

Hochwirdigster in Goth Furst, Genediger Herre.

Unser bereitwillige und gantz unvordrossene dinste seint Ewer Hochwirdigsten Genaden in allewege bevoran entpholen.

Genediger Herre.

Wyr haben den achtbarn und hochgelarten hern Conradum Lagum beider rechte doctorem und unser stadt sindicum, / zceiger dieses brives, in etzlichen gewerben unde unser stadt obligen an Ewer Hochwirdigsten Genade gefertiget, wie och kegenwertiglichen / dinstlicher wolmehnunge abfertigen dinstlichen fleises, bittende dieselbige Ewer Hochwirdigsten Genade wolle ihme genedig gehoer volkommen glawben, / als uns selbst / geben und vorleyen och mit genediger abrichtunge an und widderummb gelangen lossen.

Das seint wir ummb Ewer Hochwirdigsten Genade (die wie hiermit Gote in langweriger gesuntheit / unde aller gelugseligen wolfart mit fleis entphelen) in allewege unsers vermogens zu vordinen geslissen.

Geben Dantzigk, am XIII Iunii anno etc. XLII.

Ewer Hochwirdigsten Genaden dinstwillige burgermeister und rathmanen der stadt Dantczigk