Salutem et omnis boni incrementum. Generose Domine amice observandissime.

Litterae Generositatis Vestrae erunt mihi gratissimae, cum quia eas longo iam tempore non viderim, tum etiam, quia benevolentiae et amoris in me vestri clara ferebant indicia. Habeo vobis gratias, quas possum, quod utique per tot tempora et locorum intercapedines me non obliviscitur. Petitis, ut vobis quae hic aguntur uberius describerem, nec tamen taedio legendi afficeremini, complectar brevibus. Hactenus imperatorem fastidiose hic opperiebamur cum magnis omnium impensis et sumptu, et hactenus nobis verba data sunt. Pridie tamen, compositis omnibus rebus, cardinalis Gurcensis hinc ab iis regibus amicabiliter solvit, qui imperatorem ad quartum ab hinc lapidem circa Prugk oppidulum ferre debet. Ibi omnia confecta confirmari debent tractabiturque ibidem, si necesse erit, nec ne, quod reges isti Viennam ire debent. Si in hoc conventu in Prugk res possunt componi, vix credo regem nostrum iturum Viennam, et sic spes nobis est redeundi proximior, quam antea. Res Prutenae in hunc modum compositae sunt, quod magister generalis tenebitur et debet regi nostro praestare homagium et omnia in pace perpetua contenta servare. Hic tamen, ne conditio immutata, quod Poloni in ordinem recipi non debent, et auxilium, quod contra infideles magister regi ferre tenetur. Etiam habet quoddam moderamen. Sunt hic multi Germani, quibus isti tractatus minime placent, qui et imperatori, et cardinali maledicunt, dum convenient et dextra dextrae data fiunt, istaque consanguinitas et amicitia aucta inter hos reges et imperatorem omnia bene stabunt et ad optatum deducentur finem etc.

Nuntius Vester deficiebat in viatico. Libens ei subvenissem, sed in eodem hic fere omnes deficimus. Rogavi igitur dominum thesaurarium, ut pro eo ad maiestatem regiam intercederet, ut aliquid daretur. Promisit demum operam, commotus tamen fuit, quod huc ad regem mitteretis in negotiis, quae castri provisionem decernunt, ac si rex hic nihil aliud haberet agendum, quam quod hic de ista provisione cogitaret. Sed nostis mores hominis etc.

Scire etiam vultis, cui me applicuerim in ista metamorphosi. Incertus adhuc sum, utrisque alioquin me offerre, plus tamen domino Praemisiliensi, qui maiorem quandam humanitatem videtur pro se ferre, et ibi, quantum in me erat, Generositatem Vestram commendavi, itaque vos etiam rogo, me domino meo magnifico palatino Wladislaviensi et omnibus nostris amicis commendatum efficite, et cum coniuge ac liberis faustiter valete.

Datae Posonii, XXV Maii, anno MDXV.

Iohannes Fflaschbinder