» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #1163

Ioannes DANTISCUS to Bona Sforza
Löbau (Lubawa), 1534-05-22


Manuscript sources:
1fair copy in Latin, in secretary's hand, author's signature, BNW, BOZ, 2053, TG 17, No. 2051, f. 148-149
2copy in Latin, 16th-century, BJ, 6557, f. 380v-381r
3copy in Latin, 18th-century, BCz, 50 (TN), No. 129, p. 441-442
4copy in Latin, 18th-century, BCz, 274, No. 239, p. 480-481

Prints:
1AT 16/1 No. 300, p. 561-562 (in extenso; Polish register)

 

Text & apparatus & commentaryPlain textText & commentaryText & apparatus

 

Serenissimae Reginali Maiestati Poloniae etc. [Dominae et d]ominae meae clementissimae

Serenissima Reginalis Maiestas et Domina, domina mea clementissima. Humillimam orationum et servitiorum meorum commendationem.

Accepi superiori die Serenisimae Maiestatis Vestrae litteras veterem illam erga me Serenisimae Maiestatis gratiam spirantes sumque illis gravissime et innocenter per clandestinos adversarios meos afflictus, non parum exhilaratus, quod Serenisima Maiestas Vestra visa mihi est ex relatione generosi domini Nicolai Grabya iustam meam contra mihi obiecta et ad Serenisimam Maiestatem Vestram inique delata iustificationem meam admisisse, pro qua in rebus cognoscendis singulari aequitate et prudentissimo iudicio Serenisimae Maiestatis Vestrae, quas possum, gratias habeo et, si possem, maiores habiturus, si cognitis delatoribus et illorum delationibus auditis me coram Serenissima Regia et Reginali Maiestate Vestra iustificare innocentiamque et fidem meam manifestiorem facere et illos, quales sint et quanti veritatis osores, omnibus declarare possem. Quod si mihi negabitur, tempus nihilominus et veritas ipsa, quae omnium rerum fortior est, omnia in lucem dabunt.

Quod tam graviter reverendissimus dominus archiepiscopus Gneznensis, qui paulo ante per litteras in gratiam mecum rediit, contra me questus est, non erat sufficiens causa, ut hoc faceret illiusque dominatio reverendissima paulo post innocentiam meam liquidius cognoscet. Cum domino Costka, ut voluit Serenisima Maiestas Vestra, composita sunt omnia convenimusque non sermone solum, verum et amico convictu. Hoc, quod utriusque nostrum honorem concernit ipsorumque dominorum consiliariorum terrarum et civitatum Prussiae, permisimus arbitrio serenissimae maiestatis regiae, quae pro sua in nos omnes clementia et aequitate incomparabili id, quod ex re omnium nostrum erit, diiudicabit. Has ob oculorum gravem dolorem dictavi potius amanuensi, quam praescripsi, humillimeque supplico, velit per gratiam suam in bonam suscipere partem et clementer dare veniam mihique, quae fuit semper, domina esse clementissima, in cuius pristinam benignitatem et gratiam me suppliciter commendo. Christus Dominus noster eandem Serenisimam Maiestatem Vestram sospitet quam diutissime et prosperet in omnibus.

Ex castro Serenisimae Maiestatis Vestrae Lubaviensi, XXII Maii anno Domini 1534.

Serenisimae Reginalis Maiestatis Vestrae humillimus capellanus Culmensis subscripsit