Genedigerr, guÿnstigerr her und gefather. Meine al zÿt wÿllig dienst send Euwer genaden zu vor.

Die vergangenen tag uff VII Agost und dar vor wol 3 mallen von hemen und Toledo Ewer Gnade geschriben und sÿd ich dis mal in Spanÿa komen pein, nÿe kaine antworten empffangen, das mich verwundret. Besorg, die brieff ver lierend sÿch. / So hab ich zu Burgos mÿt dem electus von Lunda ouch nach der leng geret der thochter halben donna Ianÿca. Achter werd es Eüwer Genaden zu geschriben haben. Und yst nÿcht pessers, dan Ewer Gnade geb der mutter uff ainn mal an 150 in 200 ducaten und nem donna Ianÿca. Die mag uff den frueling in Flander an her Haller gesant werden. Der mag sÿ nach mals Ewer Gnade in Poln senden, da mÿt das schon edel medle nÿt in dÿssen landen plib und in armuot leb / und verderbe, oder zu aÿnem guten medle wurd. Das hab ich Eüwer Gnade als meinem vertruwthen her gefather nÿt underlaussen wellen ze schriben. Imere ÿst mer an dona Ianÿa gelegen, dan von den XX ducaten ich der mutter lengst gelichen, wie ich Ewer Gnade geschriben hab etc. Ich waÿs Euwer Gnaden nÿchs nuÿes ze schriben. Der von Nassov ÿst lengst hemm aus. Wiere habend schiere nÿemand mer etc. Dÿssen hoff von mÿschen ich peinn den wyllen, die wil daz wissen, also zu unsern landen stet mich zu dÿssen landen ze erhalten. Hab des halben Euwer Gnaden gevatter, mein frowen, her zu laussen komen. Die ÿst schon von 5 monete schwanger. Mus ain bossen Spanÿer pringen, hot wil sÿ mÿt lieb erfrowen. Ich raÿs mÿt ier nach Madrÿt, da hein der hoff zuÿcht. Von dannen aus wil ich Eüwc[h] gewÿther schriben und unser arms hoff wessen etc. zaÿgen.

So wart wiere al tag zu vernemen, dar man wÿder ainn pontifix erwelt hab, der ainn guther pastor sige da... und als gutzs fuÿr die crÿstenhait verlich Got der her. Meine frow laut Euwer Gnaden ier dienst und grus sagen. D[a] mÿt Got dem herren befolchen.

Geben zu Valladolid uff 14 Octobris 1534.

Ewer Ganden wirdiger diener und gefather U. Ehinger