BCz, 1606, p. 206

Dem Erwirdigen in Gott unserm besondern liben freundt, herren Johansen bischoffn zw Colmensehe

BCz, 1606, p. 205

Unnser freuntlich dinst zuvorn.

Erwidiger in Gott besonder lieber freundt. /

Nachdem wir E(wer) L(ieb) zu sonderm gefallen, / uff denselben bith und begern verflossener zeyt, / grawen munchen den pass durch unser landt unverhinderlichen in Lÿfflandt / unnd ander orth ires handels zu zciehen vergonth und zugelassen. / Dweil sich aber dÿ leufft gantz geschwind eraugen und anlassen, / auch solche personen ÿm heraus zugk ufn wege sein sollen, / und durch sÿ mit practicken odder ander anschlege, / wie wir dan wissen bey sich haben sollen. /

Dadurch sÿ woll ethwas in der geheym ausrichten und volenden mochten, dass diesen landen und leutten desgleichen konnig(liche)r ma(ieste)t nicht wenig nachteils doraus entstehen und erfolgen mocht. / So ist unser freuntlich bitt E(wer) L(ieb) wolten daran sein. / Nachdem solche personen uffn wege auch briff und anders, wie wir glaubwirdig bericht beÿ sich haben solten. / Wo dieselben bey E(wer) L(ieb) odder aldo umb / langk ankommen wurden / dieselben briff von inen fordern / und uns ufs erst wolverwarth uberschigken, / damit so wir ethwas doraus das uns unsern landt(n) leutten und konnig(liche)r ma(ieste)t zum nachteil gereichen mocht / vernhummnen. /

Dinselbigen in zeyt vorzukommen were / und diwil wir dan / denselben personen den pass / umb E(wer) L(ieb) unnd sonsten nymandts anders willen gestath und zugelassen. / So woln wir uns gentzlichen zw E(wer) L(ieb) vorsehen und getrosten / an derselben vleis, / wie unser vertrawen sleht nichts erwinden lassen. /

Das wollen wir umb E(wer) L(ieb) in freundtschafft beschulden.

Dat(um) Konnigsbergk, ann 28 tag Aprilis anno etc. ... illegible⌈...... illegible⌉ XXXV-o. ... illegible⌈...... illegible⌉

Vonn Gots gnaden Albrecht marggraff zu Brandenburgk in Preussen zu Stettin, Pommern, der Cassuben und Wenden hertzog, burggraff zw Nurmbergk unnd furst zw Rugenn