» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #1309

Georg von BAYSEN (BAŻYŃSKI) to Ioannes DANTISCUS
Mewe (Gniew), 1535-06-04
            received [1535]-06-09

Manuscript sources:
1fair copy in Latin, autograph, BK, 230, p. 343-346

 

Text & apparatus & commentaryPlain textText & commentaryText & apparatus

 

BK, 230, p. 346

Reverendissimo in Christo patri et domino, domino Ioanni Dantisco Dei gratia episcopo Culmensi et ecclesiae Pomezaniensis administratori, domino suo observandissimo

BK, 230, p. 343

Reverendissime in Christo pater et domine, domine observandissime. Servitiorum meorum commendatione praemissa.

Rogatum habuit me dominus Achatius Czema castellanus Gdanensis, quo legationem suam ad Livonienses Reverendissimae Dominationi Vestrae transmitterem, qui pro festo domini Ioannis una cum collega plebano ut dicitur ex Vilna legationis munus exsequentur. Mitto igitur praesentibus, ipse autem praeterita tertia feria iter aggressus, quem Deus conducat et reducat.

Ceterum, reverendissime domine, auditur curatum Christburgensem esse delatum apud Reverendissimam Dominationem Vestram quasi sit uxorius, igitur Reverendissima Dominatio Vestra commisisset eum relegare, cum tamen eadem sua eius satis provectae est aetatis et honeste ut dicitur se gerit, ut non sit de iis mala suspicio nec de coniugio constat, solum ob bonos mores feminae eam libenter apud se habet nec eam relinquere in animo est, ubi cogetur, relinquet potius domicilium, ut id non novum est in concubinis. Nescio quid melius nutrire publica cum ignominia an potius habere coniugatam bona conscientia. Novit Reverendissima Dominatio Vestra, quam rari sint boni contionatores et presbyteri, et hic competenter contionatur et bonae est aestimationis et conversationis, quare rogavit me praefatus nepos meus dominus castellanus Gdanensis etc., ut in absentia eius intercederem apud Reverendissimam Dominationem Vestram, id denegare non licuit. Rogo igitur Reverendissimam Dominationem Vestram dignetur eundem parochum Christburgensem gratiose tolerare, cum inde nullum nec scandalum imminere apparet aut periculum. Id tam prae omnibus nepos meus quam ego Reverendissimam Dominationem Vestram promereri sedulo studebimus. Cum his me Reverendissimae Dominationi Vestrae unice commendo, quam felicissime semper in multos annos valere cupio.

Ex Meva, feria quarta, quarta Iunii anno tricesimo quinto super sesquimillesimum.

Eiusdem Reverendissimae Dominationis Vestrae obsequentissimus Georgius a Basen etc. Mevensis capitaneus etc. subscripsit