Reverendissimo in Christo Patri et Domino, domino Iohanni Dantischo, episcopo Culmensi etc., domino suo

Reverendissime in Christo Pater et Domine, mi Domine osservandissime(!).

Solita servitiorum meorum commendatione praemissa.

Ago et habeo immortales gratias Dominationi Vestrae Reverendissimae, pro his novitatibus et litteris, quas hic idem suus famulus ad me attulit, rependam hanc tantam in me benevolentiam mutui amoris studio paratissimisque obsequiis, quae in quacumque fortuna et quocumque tempore erunt Dominationi Vestrae Reverendissimae et presto, et deditissima et ut partem mei persolvam debiti, significo illi serenissimas maiestates, principes nostros clementissimos ex Dei Omnipotentis munere optime felicissimeque valere.

Ad bellum contra Moschos expeditus est exercitus non contemnendus, sed adhuc generalis campiductor domi suae se continet, iturus ad exercitum vel satis sero, vel ad Kalendas Graecas. Nemo est, qui ambigat impensum et tempus peritura. Inter dominos Lithuanos et dominos Polonos nulla est concordia, quorsum tamen discordia evadet, exitus edocebit.

Est hic fama incerto auctore vulgata brevi serenissimas maiestates hinc in regnum se collaturas. Mussitatur tantum, ubi clarius innotescet, Dominationem Vestram Reverendissimam non latebit.

Ex Barchinona binas accepimus litteras a domino Fabiano. Scribit caesarem deliberasse traicere in Italiam. Expectabatur Andreas de Oria, a cuius consilio tota causa dependet. Ultimae litterae sunt datae XX-a Aprilis. De negotiis sacrae maiestatis reginalis scribit se nihil confecisse, sed optime sperare et nonnulla iecisse fundamenta, super quibus possit aedificium ex animi sententia construi et terminari. Deus coepta suo favore et gratia secundet.

Commendo me et servitia mea eidem Dominationi Vestrae Reverendissimae, quae felicissime et diutissime valeat.

Datae Vilnae, die XV Iunii 1535.

Eiusdem Vestrae Reverendissimae Dominationis ad mandata paratissimus Ludovicus Aliphius etc.