Reverendissimo in Christo Patri et Domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo Pater et Domine, amice praestantissime et singulariter observande.

Salutem et secundos rerum successus Dominationi Vestrae Reverendissimae vehementer opto.

Litteras Reverendissimae Dominationis Vestrae cum praesentium exhibitore heri sane accepi, quas legi, perlegi et relegi, quo autem illis respondeam, pro meo captu meum esse officium censeo.

Si Vestra Reverendissima Dominatio ad nuptias illas celeberrimas voluerit tamquam vocatus, sive sua sponte ire non vocatus, relinquo prudentissimo Reverendissimae Dominationis Vestrae arbitrio, non deerunt, qui id fortassis obloquentur, si vocatus, dicent alii, contempti sumus, vel non vocatus ingerit se et videri vult, tamen audivi episcopum Lucam non vocatum frequenter visitasse comitia Polonica. Si ex re, ut arbitretur Vestra Reverendissima Dominatio sibi commodari et profuturum esse, ut etiam rationes praegnantes inducit, non dissuaderem. Ego, si etiam vocatus essem, mandatum domini mei explere ob adversam meam valetudinem nequaquam valerem, alioqui a sanctis illis nuptiis et celebratissimis non me alienarem, taceo contumaciter absentare deberem.

Quod ad impensas et viaticum pertinet, scripsi nuper effluxis diebus X vel circiter cum quodam proficiscente in Allensten et Hohensten Reverendissimae Dominationi Vestrae, ex quo patefecit mihi, quod sua frumenta propter infestum mare per Lubicenses concitum aequo valore vendere nequiret, quo vilius, quam valerent, non venderet, illi me praestaturum iuvaminis levamen, tametsi pecuniosus non sim, prout a nonnullis fortassis in aestimatione reputer, eo quod census similes, prout mei praecessores perceperunt, non exigo, utcumque ducentos florenos in moneta et si tandem tanta necessitas fuerit et me pecunia carere voluerit, trecentos mutuo praestabo non adiuncta pignoris fide, sed cyrographi, in quo peto me securum facere, ut melius novit, obitus causa, et quando illum ad me mittet et assignabit mihi cyrographum, qui secum pecuniam auferet, illi consignabo, quod scripsi et pollicitus sum pecuniam. Quod deberem super huiusmodi impensas verba facere cum dominis consiliariis, tempus non suppetit, si etiam suppeteret, inutiliter, vereor, verberarem aerem.

Michaelis noster conventus quomodo celebrabitur, Deus novit. Alia ex aliis litteris nuper missis Vestra Reverendissima Dominatio, quam felicem et florentem valere cupio, intelliget cuique me diligentissime commendo amori fraterno consueto.

Ex Helsberg, 23 Iulii 1535.

Vestrae Reverendissimae Dominationis bonus et deditissimus frater Mauritius episcopus Varmiensis scripsit