» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #1341

Johann DOBNECK (COCHLAEUS, WENDELSTEIN) to Ioannes DANTISCUS
Meißen, 1535-08-07
            received [1535]-09-20

Manuscript sources:
1fair copy in Latin, autograph, UUB, H. 154, f. 135-136
2register with excerpt in Latin, English, 20th-century, CBKUL, R.III, 30, No. 91

Prints:
1HIPLER 1891 No. 33, p. 520-521 (in extenso; German register)
2ENGELBERT p. 218-219 (in extenso)
3DE VOCHT 1961 No. DE, 309, p. 247 (English register)
4AT 17 No. 440, p. 544-545 (in extenso; Polish register)

 

Text & apparatus & commentaryPlain textText & commentaryText & apparatus

 

UUB, H. 154, f. 136v

Reverendissimo in Christo Patri ac Domino, domino Ioanni Dantisco episcopo Chulmensi etc., domino suo gratioso iugiterque recolendo

UUB, H. 154, f. 135r

Reverendissime in Christo Pater, ornatissime praesul ac domine. Salutem.

Inter omnes incliti regni Poloniae episcopos una Reverendissima Dominatio Tua de facie mihi nota est. Unde factum est, ut et confidentius et frequentius ad Reverendissimam Dominationem Tuam, quam ad alios Polonos litteras dedi. Verum in hanc usque horam nihil prorsus responsi a Reverendissima Dominatione Tua ad manus meas pervenit. Nunc per proprium nuntium iterum scribo, ea spe, ut is Reverendissimam Dominationem Tuam Cracoviae in regalibus nuptiis inveniat. Misi ad Reverendissimam Dominationem Tuam plerosque libellos et eum, quem nomini tuo dicavi, non semel, quem et nunc mitto, si forte malignitas fortunae ceteros intercepisset. Gratia, eruditio et humanitas tua Ratisponae in conventu imperiali probe mihi perspectae sunt. Quare confido fortiter, Reverendissimam Dominationem Tuam non denegaturam esse mihi responsum per hunc certum written over ...⌈... illegible⌈...... illegible⌉tumtum written over ...⌉ et bonae fidei nuntium meum. Qui et alios quosdam e libellis meis Reverendissimae Dominationi Tuae afferet, inter quos unus iuniori regi vestro nuncupatus est. Quem illi acceptum reddere poterit vel unum Reverendissimae Dominationis Tuae verbum gratiosum, quo regiae celsitudini commendetur, saltem a bona voluntate offerentis. De doctissimo viro Iohanne Campensi, qui Reverendissimam Dominationem Tuam comitabatur Ratisponae, nihil interim accepi, nisi quod ex editione Psalterii eius secunda intellexi eum in Poloniam profectum fuisse. Mitto nunc catalogum libellorum, quos intra breve tempus edidi, et quidem sumptu meo cunctos, ut inde intellegas, quam grave mihi fuerit impensarum onus. Addo et rerum Bohemicarum argumentum, ut videas, quam parum sit mihi otii. Reverendissima Dominatio Tua dignetur, obsecro, omnia in meliorem partem, ut est humanitas tua, interpretari. Bene vale, Praesul eximie, studiosorum patrone semper memorande, Domine clementissime.

Ex Misna civitate, VII Idus Augusti anno Domini MDXXXV.

Eiusdem Reverendissimae Dominationis Tuae devotus clientulus Iohannes Cochleus, novicius canonicus ecclesiae Misnensis

Postscript:

Urbs Monasteriensis, Anabaptistarum regia, nuper capta est. Deus faxit, ut omnes aliae Germaniae urbes huius clade a tali scelere deterreantur.