Scrips[imus] pauloante commendantes ecclesiae nostrae i[n] ⌊Goląbya⌋ Dominationi Vestrae in spiritualibus administration[em], ob id maxime, quod ⌊vicarii⌋ ibidem nostri nobis per dominum ⌊Bohus⌋, cui decimas nostras arrendavimus, delati fuerant, quod in cura ecclesiae et sacramentis conferendis essent negligentes, plusquam temulentiam quam ordinem, qui in ecclesia servari debet, sequerentur. Verum cum paulopost unus vicariorum nostrorum, dominus ⌊Thomas⌋, hic apud nos cum litteris alterius domini ⌊Valentini⌋ fuisset nosque non sine magno dolore certiores reddidisset, quibus saevis et inhonestis modis apud ecclesiam nostram per ipsum dominum ⌊Bohuss⌋ tractarentur seque in delatione nobis facta satis, ut nobis visum est, iuste excusassent fassi semel dumtaxat in baptismo propter chrismatis defectum fuisse impedimentum, rogamus Dominationem Vestram, velit ad eandem nostram ecclesiam non gravate descendere omniaque, quomodo habeant, experiri debitumque in ea ordinem facere atque instituere, quo cultui divino sacramentorumque administrationi nihil derogaretur nobisque per litteras suas declarare, quibus modis ea quae ad nos delata sunt, in veritate existant ipsique domino ⌊Bohus⌋ nostris verbis et ex officio Dominationis Vestrae dicere, ut a rebus ecclesiasticis et vicariis nostris se contineat, tum quod a nobis nullam ad id habeat facultatem, tum etiam quod ad eum haec sollicitudo non pertineat, quodque se in vicariorum nostrorum institutionem seu destitutionem non intromittat et dominum ⌊Thomam⌋ cum alio suo ⌊collega⌋ pacifice et quiete apud ecclesiam nostram munia ecclesiastica exercere permittat. Si vero quapiam in re ⌊vicarii nostri⌋ negligentes seu culpabiles invenientur, idipsum Dominatio Vestra, cui h[oc] amice commisimus, ex officio suo emendabit. Mittemus etiam
paulopost ⌊cancellarium nostrum⌋, qui Dominationem Vestram in iis omnibus de mente nostra informabit. Quam bene et feliciter valere optamus.
