BHA, Fuerstensachen, 348, f. 3v

Dem durchlauchten, hochgebornen fursten und hern, hern Wilhelm, von Gots genaden hertzog in obern und niedren Beyern, / pfaltzgraff am Reynn(en), / [...] text damaged⌈[...][...] text damaged⌉gunstigenn hern und freunde. /

BHA, Fuerstensachen, 348, f. 2r

Durchlauchter, hochgeborner furst, grosgunstiger, lyber(r) her und freundt. /

Unser freuntliche, willige dinst zcuvoran. /

Den XVII Ianuarii negst vorgangen hab wir Ewer(en) furstlichen Durchlauchticheyt was seliges meyster Hans Zwickoff gewerbe an uns war mitbrengen / zu geschriben. / Wir hetten auch dasz mal noch solchs gewerbs meynung / E(wer) f(urstlichen) D(urchlauch)t gernne freuntlich und nutzlich gedient, / auch weyter zu thun uns erbieten. / Am guten willen, / sovil muglich, / ist nichts und sol vordan nichts abghen etc.

Im negsten schreyben, / wy wir im sin gehabt, / yst uns entfallen under andern geschefften / E(wer) f(urstliche) D(urchlauch)t zu bytten, / wolde befellen umb zcu fragen / umb ein jungen polnischen edelman, Lenhart Sokolnitzki genent, / den welchen wir vor siebentzehen jaren widerkomend aus Hispanienn(n) von ytziger kay(serliche)r m(ajeste)t zu Insbruck dem gestrengen hern Caspar Wincerer(en), ritter etc. in dinst gegebenn, / und er ihn weytter, / wie wir vor etlichen jaren von im bericht, / einem etlichen graffen vor eynnen dyner zugesteldt, / und bis her nicht wyssen, / wo er sey, / ab er lebe, / ader wy seyn sachen ein gestaldt haben. / Seynne guther hat sein bruder(e), ein geystlicher, nicht mit kleynnem alter beladen, / der uns fast gebethen / umb ihn zu schreyben und zu undersuchen, / wor gedachter sein bruder Lenhart sey hin komen. / Dieweyl wir dan vorstanden, / das her Casper Wincerer mit thode abgangen, / und solcher graff, / des nhamen uns unbekanth, / under E(wer) f(urstlicher) D(urchlauch)t gesessen, / bytten wir mit hochem vleys, E(wer) f(urstliche) D(urchlauch)t wold sich freuntlich nicht besweren / zu bofelhen ymands von den yren / solche frag und umb suchen / von gedachts Lenharts wegen zu thun, / und was derhalben erkundyget und erfaren wurd / uns myt BHA, Fuerstensachen, 348, f. 2v dem ersten lassen zuschreyben, / das wir umb E(wer) f(urstliche) D(urchlauch)t, / in der alde gunst wir uns befelhenn(n), / alletzeyt freuntlich und wyllig gerne wollen vordienen. /

Datum aus unserm slosz Lobaw, den XVI Marcii MDXXXVIIt(en)

Ioan(n)es, vo(n) Gots gnaden byschoff zu Culmen(n), administrator des byschtumbs Pomesan.