Unsernn freuntlichnn grues mit aller wolfart wunsch zuvorann. / Ersamer her Jorge, liber freundt. /

Wir schicken hie an euch unsernn bruder Bernarden / mit den geschefften und hendlen, die wir noch zu Rom habnn auszurichten / und habenn bey hern Jacob Luduigen zw Thornn mit dem hern electenn zcwetausent hungarische gulden in golde und muncze noch des goldes wirde eingelegt, / wie ir dan von unserm bruder unnd Jacob Luduigen werdet vorsthenn, / bittend solch gelt wolt vorschaffen, das es zu Rom durch ewer hern zu unser beyder expedicion erlegt wurd / der meymug und gestalt, / das unsere procuratores nicht zu wissen uberkomenn, wie vil des gelts ist, / allein das man in do von gebe, was sie furdrenn und bedorffen. / Mein expedicion kan nicht mher geschen, dann meyner vorfarnn vonn Heilsberg, / als nemlich, wie ich die register gesehen, 750 ducaten / des [hern] electenn, / so im recht wirt geschen vil wy m.... So dannoch, / wie ouch das kuem, / uber die IIM d[ucaten], das nicht wol muglich, / was mher wurd gefu[nden], das do vor ewer hern guthsprechen und globtnn zu unsermm underricht, / was dan das wurd s..., wolle wir samptlich mit demm hern electnn e[wer] hern schadloss haldenn. / Was aber von mey... und des hern electenn tausent ducaten, / die er zu ... in golde eingelegt, wurd uberbleibenn, / sol m... von meynemm gelde demm procuratoren, hern Theod[ericum] von Rheden, dreissig ducaten und von des hern e[lecten] XX ducaten vor sein mhu gebenn, / und das ube[r] uns beyden zu guthe haltenn etc. Ouch hab w[ir] gedochtem procuratori geschribenn durch die ewre[n], unser expedicion uff unser beyder unkost an ... von Rom zu schickenn / und in sunderheit du... oder briff, deer vonn des hern electnn wegen an konigliche [majestet] geschribnn und gehorig, / allem vormacht an e... senden, / das ir den koniglicher majestet uberantwurt, / ... brive von ir majestet bittenn vor den hern electnn do... im die possession gegebnn und die underthann in... horsam komenn etc. Wollet hirinne fleis th[un] und die meynung ouch ewrnn hern Antoni wissen, der uns negst gancz freuntlich geschribenn / und uns zu willen zu sein erbotten, / wor uff unser a[nt]wurt hie beygebunden. / Was sunst weiter zuthun sein, hab wir gedochten unsernn bruder euch zu bereden und handlenn mitgebenn, / von den w... ir ouch horen, wie es iczt ummb uns steth, un[d] wir im korczen, / wan wir unser ding und g... hie habenn zusamne gebracht und eingemacht .../ Heilsberg. Goth gebe sein gnad. / Uns werden b..., dem wir euch thun befelenn. /

Datum aus unse[rm] slosse Lobau, den XVI Novembris M D XXXV[II].