Letter #2122
Paweł PŁOTOWSKI to Ioannes DANTISCUSFrauenburg (Frombork), 1539-03-23, postscript 1539-03-25
| received [1539]-03-27 Manuscript sources:
Auxiliary sources:
Prints:
| ||||||||||||||||||
Text & apparatus & commentaryPlain textText & commentaryText & apparatus
Reverendissimo in Christo Patri et Domino, domino Ioanni Dei gratia episcopo Warmiensi, domino et benefactori modis omnibus colendissimo
Reverendissime in Christo Pater et Domine, domine mi colendissime. Praemissa sui in gratiam Reverendissimae Paternitatis Vestrae diligenti commendatione.
Scripsi non pridem Reverendissime Paternitati Vestrae de mulierculis Warmiensibus, una Alexandri occultabat se in domo per aliquot dies timendo secundas censuras, quam dixi unico puero accepto discessuram, quod non fuit factum. Dominus Alexander rediit ex Lubawia laeto fronte. Quid attulit, nescio. Manet cum domino Nideroff et focaria in curia tamquam domina, braxat cerivisiam oblita omnium malorum. Doctoris Nicolai praemisit res suas Gdanum, sola tamen adhuc Warmiae manet.
Bonum esset, quod Reverendissima Paternitas Vestra committeret officium vicariatus et offici{li}<al>atus in spiritualibus venerabili domino custodi, domino Timerman, quod officium ferebat aliquot annis tempore reverendissimi domini defuncti, nam nescio nec intelligo eo potiorem, verum quidem quod Reverendissima Dominatio Vestra habet doctores apud ecclesiam suam, sed quorsum studia sua divertunt, melius novit Reverendissima Paternitas Vestra, quam ego scribere possum.
Ego propter maximum dolorem capitis continui me domi 12 diebus, nunc exeo iterum, nondum tamen sum restitutus ad pristinam salutem.
Valeat diu et feliciter Reverendissima Paternitas Vestra et me, suum servitorem, clementi gratia prosequi non cesset, enixe precor.
Datum Warmiae, 23 Martii anno Domini 1539.
Eiusdem Reverendissimae Paternitati Vestrae addictissimus servitor Paulus Plothowski praepositus et canonicus Warmiensis
Postscript:
Sola legat Reverendissima Paternitas Vestra.
Oeconomus Reverendissimae Paternitatis Vestrae hesterno die ivit per Warmiam Marienburgum, hoc est in vigilia annuntiationis Dominae Nostrae.
Mulierculae illae dominorum adhuc nobiscum manent Warmiae, quae dicebant se velle discedere, quod non fecerunt. Fuit sparsa fama etiam certo, quod Alexandri accepto unico puero discessisset, quod non fuit factum, occultabat se in domo et curia, quousque dominus Alexander rediit ex Lubavia et dies Dominicas praeteriit, quo timebat secundas censuras etc. Nisi sinceriter procedat Reverendissima Paternitas Vestra et, ut dicam, nec pulvis earundem maneat Warmiae et ne perpetuo redeant Warmiam etc. eiecto hoc pessimo fermento veteri mulierum, Reverendissima Paternitas Vestra cogitabit tamquam prudentissimus princeps et praesul, quam plures nostrum essent sacerdotes et ne viduata ecclesia permaneat Reverendissimae Paternitatis Vestrae, quod si effecerit, apud Deum sine dubio mercedem et apud homines perpetuam laudem et gloriam habebit.
Mitto responsum Reverendissimae Paternitati Vestrae, quod tangit mandata etc. et si infirmus fui, tamen voto meo scripsi et significavi statim venerabili capitulo, quod tamen non fuit factum, nisi cum exivi etc. quod absque omni protractione responderetur Reverendissimae Paternitati Vestrae. Parcat Reverendissima <Paternitas> Vestra, quod ita audacter consulo et scribo Reverendissimae Paternitati Vestrae, quae facio, facio propter honorem Dei et Reverendissimae Paternitatis Vestrae et nostrorum omnium.
Raptissime. Datum Warmiae feria tertia die annuntiationis Dominae Nostrae.
Litteras scripsi 23 Martii.
Idem qui supra servitor perpetuus.