Reverendissimo in Christo Patri et Domino, domino Ioanni Dei gratia episcopo Warmiensi dignissimo, domino suo clementissimo

Humillimorum servitiorum meorum commendatione semper praemissa.

Reverendissime in Christo Pater et Domine, domine imprimis clementissime.

Reverendissimae Paternitatis Vestrae carissima mater, cui Dominus perpetuam requiem donare dignetur, fuit etiam membrum et soror fraternitatis dominorum sacerdotum et fecit se inserere in matriculam aliarum sororum et fratrum. Pro cuius anima, modo Paternitati Vestrae Reverendissimae placuerit, post festum Sancti Michaelis exsequias celebrare constituimus. Pro more nostro datur collatio et prandium tam sacerdotibus, quam etiam laicis, qui in ea fraternitate sunt. Potest Reverendissima Paternitas Vestra alicui civium hoc committere, qui hoc suscipiat onus instruendi prandii. Meo iudicio constabit marcas 4-or vel paulo plus. Haec mihi tota fratrum communitas Vestrae Reverendissimae Paternitati insinuare commisit. Sunt in ea fraternitate ex laicis antiquus Miglancz, Schonbrosian antiquus praeconsul, Golder antiquus, Hans Paszke antiquus scultetus, Nymfgar etc.

Et cum iis me Reverendissimae Paternitati Vestrae, uti domino meo clementissimo, cui ob plurima beneficia multum debeo, me ea, qua decet, reverentia commendo.

Datum Lubaviae, VII Iulii anno MDXXXIX.

Eiusdem Reverendissimae Paternitatis Vestrae obsequentissimus capellanus, Valentinus parrochus Lubaviensis