Dabit mihi veniam Reverendissima Tua Paternitas, quod ex tanto locorum intervallo ausim interpellare sacra tua studia, sanctosque labores, homo non satis notus et perquam tenuiter eruditus. Sed hic ipse Wartenius, ή μάλλον Παρθένιος, vir multis adeo dotibus insignis, cuius amicitia per dominum Cornelium Scepperum mihi conciliata est, ad patriam rediturus, contendebat, ut ne mearum litterarum expers discederet; nec ego quicquam potui denegare serio postulanti, cupioque per eundem in album tuorum {ratiocinariumque} describi. Nec enim contemnes, opinor (quae tua est humanitas) amiculum sua se sponte dedentem; et si Statio credimus, firmior est subinde amicitia quae studiorum similitudine contrahitur, quam sanguinis aut generis. Natos, inquit,

genuisse <necesse> est:

Hos legisse iuvat. Tenero sic blandus Achilli

Semifer Aemonium vincebat Pelea Chiron.

Nec senior Peleus natum comitatus in arma

Troica, sed caro Phoenix haerebat alumno.