Dem erwirdigenn in Got unnserm besundern lieben freunt unnd nachbarn, herrnn Johansen bishoffen zu Ermelandt, desgleichenn dem edlen und ernvesten unserm besundern lieben Achacio Zcemen Dantzker castellan, erbling zu Cristburg unnd haubtman zum Stum, samtlich unnd sunderlichen

Von Gots gnaden Albrecht marggraff zw Brandenburgk, in Preussen, zu Stettinn, Pommern, der Cassuben und Wenden hertzogk, burggraff zu Nurmberg und furst zu Rugen.

Unnser freuntlich dinst gunstigenn grus unnd gnedigenn willen zuvorn.

Erwirdiger inn Got, besunder lieber freund unnd nachtbar, edler unnd ernvhester besunder lieber.

Nachdem unns etzliche hochwichtige hendell in wellichenn wir Euer Lieb, unnd ewernn rath und bedencken hoch benottigt vorgefallenn, welliche auch durch shriefftenn ausgericht werden nicht mogenn.

Als habenn wir trostlicher zuvorsicht bey Euer Lieb unnd euch freuntliche unnd trewhertzige mitteÿlung ewers gut bedunckens wie pishero gescheenn findenn werdenn. Denn ernvhesten unseren hauptman zu Tapiaw rath unnd lieben getrewenn Georgen von Kunhaim ann Euer Lieb unnd euch / dieselbenn nach der lenge aller hendell in hoem vertrauenn zuberichten abgefertigt. / Freuntlich unnd nachbarlich bittent gnediglich unnd gunstlich synnende Euer Lieb unnd ir bemelten Georgen von Kunhaim in seinem anbringen gleich unns selbst gunstiglichen glaubenn gebenn, / unnd die hendell alle in hoem vortrawenn aufnemen / habenn unnd vortrewlich behaltenn wollet. / Unnd ime Euer Lieb unnd ewer trewhertzigk bedenckenn unnd wolmeinenn, / uns dasselbe weiter antzubrengenn freuntlich nachtbarlich unnd dinstlich antzeigenn. / Das seint wir umb Euer Lieb unnd euch freuntlich nachtbarlich gnedig unnd gunstiglich zuvorschuldenn unnd in gnaden zuerkennen zum hochstenn begirigk / unnd gemeindt.

Datum Konigsbergk, denn 10-ten Februarii anno etc. im XL.

Von Gots gnaden Albrecht marggraff zw Brandenburg, in Preussen, zu Stettin, Pommernn, der Cassuben und Wenden hertzogk, burggraff zw Nurmberck unnd furst zu Rugen manu propria subscsripsit