Reverendissimo in Christo Patri, domino, domino Ioanni Dei gratia episcopo Varmiensi, domino fratri et amico observantissimo

Reverendissime Domine, domine frater carissime.

Salutem ac omnem precamur Vestrae Reverendissimae Dominationi felicitatem.

Cum Vladislavia iter Posnaniam versus continuassemus, obtulit sese nobis nuntius una cum litteris magnifici domini palatini Inovladislaviensis, qui quidem nos oravit plurimum (putans nostram intercessionem quicquam ponderis habituram), ut negotium capellani eius Laschewsky Vestrae Reverendissimae Dominationi commendaremus, cui cum nihil in rebus licitis negare poterimus. Rogamus itaque Vestram Reverendissimam Dominationem, sentiat hasce litteras sibi intercessionis auxilium attulisse. Siquidem a tanto viro et eius cliente non nisi aequa et honesta a nobis peti existimamus, agitur eum negotium favorabile successionis in patrimonium. Quare aequitati et iustitiae Vestra Reverendissima Dominatio cum aliis illius provinciae proceribus deesse nolit. Ceterum nos Vestrae Reverendissimae Dominationi commendamus.

In villa nostra Parcanie scripsimus secunda Maii anno Domini MDXXXX-o

Vestrae Reverendissimae Fraternitatis Lucas comes a Gorka Dei gratia episcopus Vladislaviensis