Reverendissimo in Christo Patri et Domino, domino Ioanni Dantisco Dei gratia episcopo Warmiensi, domino et amico suo carissimo et honorando

Reverendissime Domine, domine et amice singulariter gratiose ac honorande.

Post solitam sui commendationem. Salutem et omnem pro voto animi accessionem Vestrae Reverendissimae Dominationi ex animi mei sententia exopto.

Praeterea confisus gratiae et favoribus Vestrae Reverendissimae Dominationis, in qua ego numquam dubitavi, immo eandem mihi semper parare studui, ut tempore se offerente in negotiis quibusvis ea amicitia Vestrae Reverendissimae Dominationis uti valeam. Quid itaque acciderit negotium hoc domini Adae Valowski, generis mei, occasionem, cuius coram Vestra Reverendissima Dominatione ceterisque dominis consiliariis ducatus Prussiae in conventione proxime futura illius ducatus actionem habet et habiturus est. Vestram itaque Reverendissimam Dominationem, dominum et amicum meum gratiosum, rogo, quatenus Vestra Reverendissima Dominatio in causa et actione eiusdem domini Valowski satis iusta consilio et auxilio adesse dignetur, uti ex eodem domino Valowski vel ex eo, qui rem ipsius custodiet, in ea causa Vestra Reverendissima Dominatio latius intelligere dignabitur, quam ego uti meam propriam fore existimo. Certusque sum Vestram Reverendissimam Dominationem in praemissis erga eundem dominum Valowski gratiose se exhibere dignaturam eamque benevolentiam et amicitiam Vestrae Reverendissimae Dominationis in praemissis exhibitam modis omnibus remereri et referre studebo semper.

Cuius tandem favoribus me commendo.

Quam sanam ac felicissimam diutissime valere exopto.

Datae in Iedlna, feria secunda Rogationum anno Domini 1540.

Petrus de Dambrowicza palatinus Lublinensis, Radomiensis et Casimiriensis capitaneus, idem servitor Vestrae Reverendissimae Dominationis ad vota paratissimus manu propria subscripsit