» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #2418

Michał GŁOWA to Ioannes DANTISCUS
Cracow (Kraków), 1541-04-26
            received Marienburg (Malbork), 1541-05-12

Manuscript sources:
1fair copy in Latin, AAWO, AB, D. 6, f. 43

Auxiliary sources:
1register in German, 20th-century, B. PAU-PAN, 8249 (TK 11), f. 315
2register in English, 20th-century, CBKUL, R.III, 31, No. 339

Prints:
1HIPLER 1891 No. 56, p. 561 (in extenso; German register)

 

Text & apparatus & commentaryPlain textText & commentaryText & apparatus

 

Reverendissimo in Christo Patri et Domino Ioanni Dei Gratia episcopo ecclesiae Varmiensis, domino suo clementissimo

Salutem, Reverendissime Domine.

Tametsi Reverendissimae Paternitati Vestrae minus cognitus sum nullamque occasionem habeam scribendi opportunam, praeterquam quod nepotes Reverendissimae Paternitatis Vestrae Agustinus et Ioannes voluntate spectabilis domini Georgii Hegel, civis Cracoviensis, de re publica optime meriti, gratia perdiscendarum bonarum litterarum et praeceptis philosophiae capessendis adhaeserunt. Idne voluntate illorum factum sit, affectu vel amore, aut spe cumulatioris eruditionis, quam in me inesse sibi ipsis persuaserant, aut voluntate Dei Omnipotentis? Quod suspicari et concredere, magis cohaerens et consonum mihi apparet. Cuius ineffabilis benignitas, misericordia incredibilis id nunc ordinat atque efficit, ut in gratiam tanti antistitis tamque consultissimi primatis, quo fere uno clerus imperii Polonici gloriatur palmamque plebs promiscua in ferendis consiliis prae ceteris tribuit, recipi dicique clientulus merear. Faxit Deus, ut dignus oculis Reverendissimae Paternitatis Vestrae videar, quo gratiam assequar; verum eam assequi neutiquam puto, nisi dum nepotes Reverendissimae Paternitatis Vestrae carissimos et moribus et scientiis cultiores efficiam, quod mihi factu quoque facillimum inde videtur, dum illos probatissimos, moratos et virtutum amatores perspexi, talesque tamque dignissimos, in quibus iusta causa ferendi cumulatioris commodi Reverendissima Paternitas Vestra sumptus tantos collocat. Nec spe frustrabitur diis propitiis de illis concepta; etenim illos peculiariter Reverendissimae Paternitati Vestrae ornamento futuros, amicis patriaeque suae non parvum honorem confido suis vigiliis ac studiis allaturos. Utrum alteri praeferam, praeterit me sane, cum utrique ferventissimus in studiis adsit animus. Cum his me committo gratiae et benignitati Reverendissimae Paternitatis Vestrae longamque salutem a domino Deo Christo Iesu humillime comprecor, quam Reverendissimae Paternitati Vestrae longam tribuat in nostrarum omnium consolationem.

Cracoviae, XXVI die mensis Aprilis, anno Domini 1541.

Michael Glovnitianus, disciplinarum liberalium magister et collega Almae Universitatis Cracoviensis, Reverendissimae Paternitatis Vestrae clientulus obsequentissimus scripsit