Reverendissimo in Christo Patri et Domino, domino Ioanni Dei gratia insignis Warmiensis ecclesiae episcopo, domino et pastori nostro gratioso

Reverendissime in Christo Pater, eximie domine antistes, domine gratiose.

Obsequia nostra numquam intermoritura sint Vestrae Reverendissimae Paternitati in officiosa commendatione sincere praemissa et exhibita.

Reverendissime ac Gratiose Domine.

Post reditum venerabilis domini Pauli Plutowsky, praepositi et confratris nostri carissimi, (quem una cum venerabili domino Achacio a Trencka etc. ad Vestram Reverendissimam Paternitatem in causis non ignoratis ablegavimus) etc., eo ipso nobis referente cognovimus Vestram Reverendissimam Paternitatem optare, ut ex fratribus certos deligamus et cum pleno mandato in rebus inter Reverendissimam Paternitatem Vestram et nos constituendis congruo tempore ablegemus, ut ecclesiae necessitati consulatur et futuris dubiis (dum mortales et labiles simus) in tempore occurratur.

Reverendissime ac Gratiose Domine.

Nunquam dubitavimus Reverendissimam Paternitatem Vestram et suo ornamento, et ecclesiae honestati defuturam, sed pastorali sollicitudine et gratia omnibus debite consulturam atque provisuram, ne haec sollemnis ecclesia suae fidei sancte et fideliter commendata aliquid discriminis aut incommodi in hoc mundi statu patiatur, neve eidem in rebus ad eam iure spectantibus in ullo derogetur, prout Vestra Reverendissima Paternitas ipsa cavere et partim iam ordinare dignata est.

Ceterum parati sumus iuxta optionem et velle Reverendissimae Paternitatis Vestrae certos de confratribus eligere et ad notos tractatus mittere, verum cum sentiamus Reverendissimam Paternitatem Vestram ad praesens nonnullis incommodis corporalibus vexari, consilium cepimus negotium hoc ad proximas post Trium Regum fer[ias] (modo id Reverendissimae Paternitatis Vestrae pace fiat) suspende[re] et tunc in benedictione caelesti destinato oper... intendere atque causae, auxiliante Deo et Vestrae Reverendissimae Paternitatis opera, speratum finem invenire. Qu[ae] mora si videbitur molesta, facile hoc nostrum consilium mutabimus atque nos ad Reverendissimae Paternitatis [Vestrae] videre et velle componemus.

Fausta et in[co]lumis Reverendissima Paternitas Vestra ad longum vivat et valeat, et nostra destinatissima officia suae Reverendissi[mae] Paternitati ex sententia commendata esse sinat.

Warmi[ae], XXVI Novembris, anno M V-c XLI.

Eiusdem Reverendissimae Paternitati Vestrae paratissimi praelati canonici atq[ue] capitulum ecclesiae Warmien[sis]