Dem Hochwirdigstenn inn Gott Furstenn unnd Herrenn, herrenn Iohanni vonn Gots genadenn des löblichenn stichts zcu Ermela[nd] bisschoffe etc. / unnsernn genedigen herr[e].

Hochwirdigster inn Gott Furst, gennediger herre. /

Unnser bereidtwillige unnd unvordrossene dinst[e] seinndt Ewer Hochwirdige Gnade besundern fleisses zcuvoran entpholenn. /

Genediger herre. /

Szo unnd nochdeme wir denno / am jungsten du[rch] unnsers raths sendebotten, so wier von wegen dieser stadt inn den negstgehaltenen tagk jen M[a]rienburg vorordent gehabt / etzliche furdernuss be...fe / ann die konigliche maiestett unsern allergenedigen herren / vonn den hoech unnd grossgeachten herre[n] stenderen unnd koniglichen rethen dieser lande / inn sachenn der zcwenn unser geliebten geladenen herrenn burgermeistere gebetten / und der sache zcu gutte erhaltenn / in tröstlichem vorhoffenn derselbigenn zcu geniessen etc. /

Welcher gennedigenn unnd gunstigen commendation wier uns jegen Ewer Hochwirdige Gnade unnd die andere unser gennediger unnd gunstige herren besunderenn fleisses dinstlich unnd frundlich bedenkenn. / Solchs auch herwidderummb ungess...ter kreffte jegen dieselbige Ewer Hochwirdige Gnade und die anderen herren rethen / alles gebures zcuvordienen stetz gewilliget wollen befunden werdenn. /

Dieweill wir aber solche schrieffte an die hochgemelte konigliche maiestett ungesumet vortgestalt unnd nhu herwidderummbe ein vorschlossener koniglicher brieff an dieselben konigliche rethe lautende villeichte dieselbige sache betreffendt an uns gelanget. /

So schicken Ewer Hochwirdige Gnaden / wir / densselbige beÿ zceiger dieszes zcum hang / die / dieselbige vordan an die andern herren rethen noch der ordenunge / werde geruchen gelangen zculossenn. / Mith der angeheffter unser dinstlichen bith, wo solche brieffe uns und die unsern belangen thetten / wolle geruchen uns derselbige abschrieffe. / Doneben auch ihres gutten reiffen raths wes dorauff ferner zcu thuende / vor das beste / beÿ Ewer Hochwirdige Gnade auschen werden muchte beÿ zceiger dieszes in gnaden teilhafftig machenn. /

Solchs ummb Ewer Hochwirdige Gnade (die Gott lange gesundt und seliglich enthalten wölle) herwidderummbe zcuvordienen wollen wir stetz unvordrosszen befunden werden. /

Datum Danntzigk, 12 Februarii anno etc. 43. /

Ewer Hochwirdige Gnade dinnstwillige / burgermeister und rathman der stadt Dantzigk