BCz, 1599, p. 326

Reverendissimo in Christo Patri et Domino Ioanni Dei gratia Warmiensis ecclesiae episcopo, domino nostro gratioso

BCz, 1599, p. 323

Reverendissime in Christo Pater, eximie domine praesul, domine gratiose.

Studia et obsequia nostra paratissima sint Reverendissimae Paternitati Vestrae in humili commendatione praemissa.

Generose domine.

Ante hos modicos dies cognovimus Reverendissimam Paternitatem Vestram ab affecta sua valetudine (quae ex diversiis viarum taediis contracta dicebatur) plene restituta atque ad suam sedem de Omnipotentis gratia rediisse felicem et incolumem.

Quae res cum digna videbatur, post tantam absentiam et ob dictos respectus ut membra suo capiti et sacrorum atque religionis ministri suo congratularentur antistiti, percommodum nos hoc facturos putabamus per aliquem certum nostri collegii nuntium, qui et viva voce, et personali praesentia nostrum testaretur officium atque cum dignitate Vestrae Reverendissimae Paternitati suum salvum gratularetur adventum.

Et opportune se obtulit nobis venerabilis et eximius vir, dominus doctor Ioannes Benedicti, serenissimi principis nostri physicus, confrater noster carissimus etc., qui ad Vestram Reverendissimam Paternitatem eodem tempore iturus nostro desiderio in capitulari congregatione ipsi officiose iniuncto perhumane annuit et id causa nostro communi nomine fideliter obeundi minime refutavit. Qui si nostris votis, ut sperabamus, respondisset, apud nos novam gratiam inisset et tanta indignatione, qua Reverendissima Paternitas Vestra videtur neglecti officii incuria exasperata, prout ex litteris Reverendissimae Paternitatis Vestrae ad venerabilem dominum praepositum nostrum scriptis apparet, nos minime onerasset. Quam si iuste meruimus, et Dei et Reverendissimae Paternitatis Vestrae iudicium esto.

Cui nos atque eandem Christo domino feliciter commendamus.

Warmiae, ultima Iunii anno 1543.

Eiusdem Reverendissimae Paternitati Vestrae obsequentissimi praelati, canonici et capitulum ecclesiae Warmiensis