Reverendo in Christo Patri, domino Ioanni episcopo Varmiensi, sincere nobis dilecto

Bona Dei gratia regina Poloniae, magna dux Lituaniae, Russiae, Prussiae, Masowiae etc. domina

Reverende in Christo Pater, sincere nobis dilecte.

Lectis litteris Sinceritatis Tuae, quas nobis ex Heilsperg sub data XVII diei Augusti scripsit, intelleximus novitates omnes, quae in externis partibus agantur, nobis significatas per Sinceritatem Tuam. Grato illas animo suscepimus tantoque magis nobis gratum erit, cum illas ad nos saepius describere non gravabitur.

Bene tandem valeat.

Datae in Nyepolomicze, XXX die Augusti anno Domini M-o D-o XLIII-o.

Ad mandatum sacrae reginalis maiestatis proprium