Letter #2685
Samuel MACIEJOWSKI to Ioannes DANTISCUSWielowieś, 1543-11-21
| received Heilsberg (Lidzbark Warmiński), 1543-12-10 Manuscript sources:
| ||||
Text & apparatus & commentaryPlain textText & commentaryText & apparatus
BCz, 1599, p. 374Reverendissimo in Christo Patri et Domino, domino Ioanni Dei gratia episcopo Warmiensi, domino amico observatissimo
BCz, 1599, p. 371Reverendissime in Christo Pater et Domine, domine amice et frater observatissime.
Salutem plurimam et officiosissimam obsequiorum meorum commendationem.
Sollicitudo haec Reverendissimae Dominationis Vestrae non modo veniam, verum etiam laudem meretur. Nam qui sacrae maiestati regiae oculorum et aurium loco sumus, decet nos sollicite investigare omnia et providere, ne quid alicunde res publica detrimenti accipiat.
Accepi hodie litteras ex comitiis minoribus Srzedensibus, sed de vicino nihil ad me scribitur. Neque credo eum cum reverendissimo domino archiepiscopo congressum esse.
Quod negotium attinet Danicum, scripsit de eo diligenter ad sacram maiestatem, condiciones etiam ascripsit, quibus pax confieri posset, verum maiestas regia in comitia consultationem ea de re reiecit. In causa citatorum, quod quidem ego sciam, nihil adhuc scripsit.
De clade, qua Ferdinandi exercitus affectus dicitur, falsus fuit rumor.
De ducentis florenis et de burgrabio res confecta ex sententia Reverendissimae Dominationis Vestrae, quinquaginta florenos annuos habebit. Dominus thesaurarius ostendit hac in re studium suum non vulgare erga Reverendissimam Dominationem Vestram, quem vel hoc nomine tanto cariorem et commendatiorem habebit, mihi quoque gratissimum factura.
Quae ut quam diutissime et quam felicissime valeat, opto ac illius amori et benevolentiae me diligenter commendo.
Ex Wieliawiesz, XXI Novembris anno Domini M-o D-o XLIII-o.
Vestrae Paternitatis Reverendissimae frater et servitor Samuel episcopus Plocensis et vicecancellarius