Reverendissimo in Christo Patri et Domino, domino Ioanni Dei gratia episcopo Warmiensi, domino et patri gratioso

Reverendissime in Christo Pater et Domine, domine gratiosissime.

Convictus, quod a tot annis contracta notitia non siverit me veteris amicitiae oblivisci, ideo quidquid in buccam venit Reverendissimae Paternitati Vestrae perscribere, occupatissimus scribo.

Ex Spira staphetta praepropero cursu volavit per Cracoviam cum litteris caesareae et Romanorum regiae maiestatis ad Isabellam reginam Pannoniae in Pannoniam <(>Transilvaniam<)>. Post eius discessum ex Nipczicsch intellexi distinctias inter Monachum maleferiatum et Pyetrowicz et parum equidem defuit, quin extremum diem Badaviam inequitasset. Subreptus clanculo evasit, sed, medius fidius, meritam brevi luet poenam.

Circa Tibiscum Andreas Bathur contra alium nobilem saevit et acriter quidem. Nostri Blindebergenses Waciam noctu ingressi multos ex Thurcis trucidarunt, onusti praeda remearunt, sed timendum est eis, ne occludantur.

Rex noster recte valet et itineri se Lithuanico accingere certo proposuit. Dominus Byeczensis castellanus huc venit in re sua, Opolaszky melius habet, duplici tamen tenetur tertiana. Nunc in Casparum Hannaw proiciat ecclesiam et ornet, in tot vacantiis titulo Warmiensis ecclesiae.

Quod Alexander miser e carceribus rursum voluntate papae et conformi cardinalium consensu emissus sit, Deo sit gratia, qui suos non deserit umquam, forte iam rectius cantabit et rancores litesque ...stiorum oblivioni tradet. Eius opera uti etiam in Urbe nunc poterit, non enim in perpetuum irascitur Dominus.

Valeat faustissime et me diligat.

Ex Warsavia, <Dominica> Conductus Paschae 1544.

Eiusdem Reverendissimae Paternitatis Ioannes Benedicti capellanus