» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #2718

Johann LANG to Ioannes DANTISCUS
Warsaw, 1544-04-21
            received Heilsberg (Lidzbark Warmiński), 1544-04-26

Manuscript sources:
1fair copy in Latin, letter and signature in the same hand, BK, 230, p. 103-104

 

Text & apparatus & commentaryPlain textText & commentaryText & apparatus

 

Reverendissimo in Christo Patri et Domino, domino Ioanni Dantisco episcopo Varmiensi etc., domino suo gratioso

Reverendissime in Christo Pater, gratiose domine.

Post humilem mei obsequiorumque meorum commendationem.

Quod Reverendissima Paternitas Vestra ex domino magistro curiae serenissimae reginae Elisabethae, dominae meae clementissimae, cognoscere optavit, id officii mei esse putavi per me ipsum Reverendissimae Paternitati Vestrae significare me aulam hanc semestri fere toto cum magna mea molestia et incommoditate secutum, in Lithuaniam, quo profectio nunc instituitur, non iturum esse, cum quod multis praesentia mea aegre est, tum quod diutius a coniuge et liberis carissimis, quibus sum obstrictus, abesse mihi integrum non est.

Siquidem mihi humanitatis et religionis meae rationem constare volo neque sacratissimum Romanorum regem pro divina aequitate et pietate sua profectionem talem a me exacturam arbitror, quam minus etiam necessariam esse iudico, quando divina suppeditante gratia et malitia certorum hominum retecta melius reginae Elisabethae res habere incoeperunt futurae ilico, cum ad regem et coniugem suum venerit, loco optimo.

Credo tamen Romanorum regem crebrius me in Poloniam legato visendae carissimae filiae gratia usurum esse.

Reverendissimae Paternitati Vestrae quocumque loco fuero et tempore quovis, ut potero, dicam et faciam, quae e re et dignitate eiusdem fore cognovero. Cui me unice commendo.

Datae Varsoviae, XXI Aprilis 1544.

Reverendissimae Paternitatis Vestrae obsequentissimus Ioannes Langus legum doctor, serenissimi Romanorum regis secretarius