Letter #2736
Stanisław HOZJUSZ (HOSIUS) to Ioannes DANTISCUSBielsk Podlaski, 1544-06-14
| received Heilsberg (Lidzbark Warmiński), 1544-06-26 Manuscript sources:
Prints:
| ||||||
Text & apparatus & commentaryPlain textText & commentaryText & apparatus
Reverendissimo in Christo Patri et Domino, domino Ioanni Dei gratia episcopo Varmiensi, domino colendissimo
Reverendissime Domine, domine colendissime.
Officiosissimam servitutis meae commendationem.
Prodeunt litterae commissionis, res enim moram longiorem ferre non videbatur, quamquam extrahi negotium maluissem, dum de sua voluntate aliquid Reverendissima Dominatio Vestra perscripsisset. Quam tamen spero, accedente mandato regio, non detrectaturam hanc provinciam. Scripsi de rebus omnibus per Psittacum copiosius, quem in Andreovio, oppido reverendissimi domini mei Plocensis, nudiusoctavus expedivi. Non dubito, quin sint litterae iam redditae Reverendissimae Dominationi Vestrae. Nunc me dolor meus impedit plura scribere, nam ex capite graviter laboro. Nova Spirensia mitto, etsi habere illam recentiora confido. Nos iam, Deo sit gratia, Vilnam non proficiscimur, sed Calendis Augusti comitia in Brziesce habituri et iis peractis in Poloniam sumus redituri, faxit Deus, ut rege incolumi, incolumes et ipsi.
Quem precor, ut Vestram quoque Reverendissimam Dominationem diu servet incolumem et felicem. Cuis me gratiae commendo.
Ex Bielsco, unde perendie, Deo bene iuvante, in Brziesce proficiscimur, XVIII Calendas Iulii 1544.
Eiusdem Reverendissimae Dominationis Vestrae servitor deditissimus Stanislaus Hosius, cantor et canonicus Varmiensis