Dem Hochwirdigen ihn Goth Fursten unnd Herren, / hern Johanni von Gots gnaden bischoffh zu Ermelanth, / unserm gnedigen herrenn

Hochwirdiger ihn God Furst, / Gnediger Herre. /

Unsere ganz willige ungesparthe dienste sein Ewer Furstlichen Gnaden stetes zuvorahn bereith. /

Gnediger Furst unnd Herre. /

Als unser diener, / welchern wihr mith briffen ihn sachen des Roemischen Reichs exaction ahn koeniglichen hoff gegen Krakaw gsanth, / wider einheimisch kommen, / hath ehr unnß diese zwene hiebeygelegthe briffe uberan <t> wurth, / welche wihr mith disem unsern diener Ewer Furstliche Gnaden dinstlich ubersenden unnd danken Ewer Furstlichen Gnaden vor gesehene forderunge, die wihr gegen Ewer Furstlichen Gnaden zuvor dienen als die willigen stetes willen gespureth werden. / Und wohe mithe wihr auch sonst Ewer Furstlichen Gnaden, / die Goth lange gsunth wolde friesten / angeneme dinste wusten zu erzeigen, / das thun wihr willig unnd gerne. /

Datum Elbing, ahm 12 Martii anno 1545.

Ewer Furstlichen Gnaden dinstwillige burgermestere und radmanne koeniglicher stad Elbinge