Dem Hochwirdigen ihn God Fursten unnd Herren, / hern Ioanni von Gots gnaden bischoffh zuu Ermelanth, / unserm gnedigenn herrenn

Hochwirdiger ihn God Furst, / Gnediger Herre. /

Unnsere gannz willige ungesparthe dienste seinth Ewer Furstlichen Gnaden allezeith mith bsonderm fleis zuvorahn bereith. /

Genediger Furst unnd Herre.

Wihr thunn unns gegen Ewer Furstlichen Gnaden dinstlich bedancken vor die forderschriffth, welche Ewer Furstlichen Gnaden unns ahn den hern Plozeschen woiwoden ihn unsern sachenn gegebenn. Was wihr aber damith erhalthenn, / haben Ewer Furstliche Gnaden aus desselbigen grosmechtikeithenn hiebeigelegthen beandworthunge ihn gnaden zu ersehenn. / Ubersenden auch hiemith seiner grosmechtikeith gegebenes decrets ein abschriffth, / damithe Ewer Furstlichen Gnaden sich zu erkundigenn, wihe solchs ubereintrage ader nichth. / Unnd damith dennach ahn unns kein seumnus gespureth, / so haben wir dennach unsern secretarien mith koeniglichenn mandaten ahn das stadgerichte zu Marienburg abegevertigeth, / verner die gerechtigkeith daselbsth zu suchen. /

Was wihr verner erhalthen und drauff Ewer Furstlichen Gnaden gnediges rads ersuchenn werden, / sein wihr ungewis / unnd sunderlicher hoffnunge Ewer Furstlichen Gnaden werden als unser gnediger her unnd patron unns mith rad nicht verlassen, das sein wihr gegen Ewer Furstlichen Gnaden zuvordienen urbo[r] unnd wahr mithe wihr Ewer Furstlichen Gnaden auch sonst angen[om]men willen wusten zu erzeigen, / das thun wihr willig unnd gernne. /

Damith thun wihr Ewer [Furstlichen Gnaden] Gothe lange gsund empfelen.

Dathum Elbingk, ahm XIIII Aprilis anno MDXLVI.

Ewer Furstlichen Gnaden dinstwillige burgermestere und radmanne koeniglicher stad Elbingk