Ad Dominum C[racoviensem]

Reverendissime etc.

Causam, quam secum adfert providus Achatius Grabow superiori anno, quo tempore ab adversa parte, abbate et conventu Pelplinensi in ea ad tribunal regium appellatum fuit , Reverendissimae Dominationi Vestrae commendaveram. Nunc vero, postquam iuxta remissionem serenissimae maiestatis regiae capita et puncta quaedam interrogationum, de quibus in mandato regio mentio sit, coram iudicio et magistratu Gedanensi proposuerit, ad quem a iudicio solutiones, a magistratu vero nihil obtinuit, denuo ad aulam in ea poficiscitur, sperans se nunc absolutionem et sententiam diffinitivam totius causae obtenturum, quo tandem a maximis expensis liberetur, et id, quod iuste videtur petere, consequatur.

Rogo itaque Reverendissimam Dominationem Vestram, velit illi suo patrocinio adesse et miserum, qui iam fere totum peculium suum in ea causa exposuit, et ab adversa parte, ut eum expensis fatigent, urgetur, commendatum habere idque apud regiam maiestatem obtinere, ut tota causa decidatur, vel per compositionem tolerabilem inter eum et adversam eius partem componatur. In eo rem Deo gratam, iustitiae convenientem, et mihi acceptam est factura Reverendissima Dominatio Vestra.

Cui cupio esse commendatissimus atque, ut eandem Dominus Deus in longissima tempora sospitet et incolumem conservet, precor ex animo.

Datae Heilsberg, XI Iunii 1547.