Reverendissimo in Christo Patri et Domino, domino Ioanni Dei [g]ratia episcopo Varmiensi, ... domino, domino mihi gratiosissimo

Reverendissime in Christo Pater et Domine, domine mihi gratiosissime.

Praemissa mei officiorumque meorum et studiorum omnium paratissimorum in gratiam Reverendissimae Paternitatis Vestrae commendatione officiosa.

Paucis ante diebus, non dicam benevolentiae, sed plurimae gratiae erga me refertae, mihi a Reverendissima Paternitate Vestra oblatae sunt litterae, quod quidem, ut videor, dicere non meritorum meorum neque etiam diuturnae commercionis causa, sed magis e singulari gratia nimiaque erga me benevolentia Reverendissima Paternitas Vestra facere dignatur. Pro tanta igitur gratia et singulari erga me benevolentia dignas, ut par est, si verba suppeterent animo, gratias agere conarer. Sed cum ea ipsa gratia, qua me Reverendissima Paternitas Vestra amplecti dignatur, tanta mi sit, ut ne dicam, gratia, verbo tenus agendo, sed prolixa serie verborum scribendo nullo umquam pacto credam satis me facturum, Deum e superis assiduis precibus solicitabo, ut mihi concedere dignetur, quo pacto non tantum perpetuis, sed etiam paratissimis officiis et servitiis meis rependere conabor.

De novitatibus nihil scitu dignum habebam, quod Reverendissimae Paternitati Vestrae scriptis meis significarem. Hoc licet Reverendissimam Paternitatem Vestram non latere sciebam, omittere tamen nequivi, quin hoc ipsum asserendo Reverendissimae Paternitati Vestrae affirmarem, quod iam huc magnificus dominus palatinus Sandomiriensis a[d] sacram regiam maiestatem iuniorem pervenerit, precibus omnibus tam a sacra [regia] maiestate seniore, quam a toto coetu senatorum Coronae precando, u[t] sacra regia maiestas iunior ad comitia Regni instantia venire dignetur. Comitia autem quando auspicatura sint, adhuc incertum est, hoc tamen ad me a quibusdam amicorum e senatu sacrae regiae maiestatis senioris scriptis perfertur ad die[m] divo Marthino dicatam auspicatura esse. Verumtamen hoc ipsum initium comitiorum positum est pro libitu et volunta[te] sacrae regiae maiestatis iunioris. Sacra regia maiestas iunior diem et tempus praedictis comitiis instituere debet, verum ego ad eam spem ducor sacram regiam maiestatem iuniorem eam institutionem comitiorum volunt[ati] sacrae regiae maiestatis senioris, parentis sui colendissimi, commissuram esse. Quapropter eum adhuc nihil responsi legatus sacrae regiae maiestatis senio[ris] quoad proximam diem Iovis acceperit, nihil quicquam certi de ins[ti]tutione comitiorum affirmare possum, hoc tamen asser[ere sacram ] regiam maiestatem iuniorem certo ad ea ipsa comitia iter facturam ..., quo autem tempore aut quo die, adhuc incertum habeo. Suspicor sacram regiam maiestatem iuniorem circa festum Marthini eo profectionem fa[cere].

Ubi faxit Deus, ut ego rebus Prutenicis et Reverendissimae Paternitatis Vestrae collegis sedulis officiis et intercessionibus meis inservire queam, in hoc studium meum intendam curamque omnem collocabo.

De pannis autem, de quibus Reverendissima Paternitas Vestra in scriptis suis mentionem fecit, reverendus dominus praepositus Troczensis nihil mihi retulit, saltem id asseruit Reverendissimam Paternitatem Vestram sibi scripsisse praedictum pannum sibi missurum iri.

Plura si qua acciderint, oblato nuntio Reverendissimam Paternitatem Vestram sine mora certiorem reddam.

His me meaque officia Reverendissimae Paternitati Vestrae commendo. Quam Deus Optimus Maximus servet salvam et incolumem, diutissime precor.

Datae e Vylna, die XII mensis Septembris anno a nato Christo M-o D-o XLVII.

Eiusdem Reverendissimae Paternitatis Vestrae servitor deditissimus Petrus a Sborovo castellanus Malogostensis, sacrae regiae maiestatis iunioris curiae magister