Regi iuniori

Serenissime etc.

Cum Serenissima Maiestas Vestra antea ad meam intercessionem generoso domino Ioanni a Baisen, castellano Elbingensi et capitaneo Gnevensi, clementem suam gratiam non denegaverit, sed eum hucusque summa clementia, qua eum etiam serenissimo parenti suo commendare non est dedignata, prosecuta sit, nunc vero tempus instet, quo de consilio harum terrarum deputati ad serenissimam maiestatem regiam nuntii legationem in causa conservationis privilegiorum nostrorum deponere debent, quorum unus etiam, dictus dominus castellanus, ad aulam regiam in eodem negotio proficiscitur, eum denuo Serenissimae Maiestati Vestrae commendandum esse duxi, ut per eiusdem clementem intercessionem apud serenissimum parentem eius, in possesione praefecturae Gnevensis, quam et proavi et parens eius fidelissimis eorum servitiis, quae serenisimis Poloniae regibus exhibuerunt, promeruerunt , conservarentur, et tandem ab impetitionibus eorum, qui privilegio harum terrarum gaudere non possunt nec inclusi sunt, liberaretur.

Quod Serenissimam Maiestatem Vestram benigne facutram esse non diffido, praesertim cum antea omnibus hic subditis suis clementem protectionem et privilegiorum conservationem promiserit. Quam ne nunc abicere velit, quibus possum, submissis meis precibus, quod libenter, si hoc ob adversam valetudinem et corporis imbecillitatem fieri potuisset, in hac legatione praesens fecissem, a Serenissima Maiestate Vestra his litteris oro. Futurum enim est, ut hoc clementi suo tutamento has terras et earum incolas non solum quietiores reddat, sed etiam in subiectionis et fidei officio eos promptiores erga Serenissimam Maiestatem Vestram faciat.

Cui me una cum dicto domino castellano humillime commendo, atque ut Serenissimam Maiestatem Vestram Dominus Omnipotens diu nobis sospitet at incolumem conservet, precor ex animo.

Datae Heilsberg, XIX Decembris MDXLVII.