Palatino Pomeraniae etc.

Unserenn etc.

Ess ist uns fast angeneme gewesenn / das Ewer Herlichkeit / unsers ohemen hernn Caspernn schreibenn / zu Crako den vierzehendenn dits monds ausgangenn / darnoch uns nicht wenig vorlangt mit eigenem botenn an uns gefertiget / und dancken derselbenn aufs freuntlichste / das die in dem uns zuwillenn gewesenn mit erbitteung solchs idere zeit herwidder vmb Ewer Herlichkeit zuboschuldenn. Wir seindt nu teglich gedochts unsers ohem wartende / dem wir auch derwegenn entkegen geschickt / auf das ehr sich in seinem zuge an uns furdere / so balde ehr ankompt / wollenn wir alle gelegenheit die thumrei czwuschen dersulben shone und dem hernn Magousky bolangende durch eigenenn boten Ewer Herlichkeit anzuzeigen nicht nachlassen. Der wir auch nicht vorhalten mugen / das wir in erfharung kommen wie gemelter Magousky bei etzlichenn rath gesucht / und vorgebenn / wie die resignatio der thumreienn auf sein personn durch einen wechsel / vor seine veterliche erbguttere / die ehr dauor Ewer Herlichkeit shon auftragen muste / geschen solte. Worin Ewer Herlichkeit den hernn Magousky vorwarnen wolte das ehr sich des nicht horenn lasse / den wo dis auskueme und die gestalt hette worde die resignatio pro contractu Simoniaco / der in begirlicher und kaiserliche rechtenn bei harter peen vmb buess vorboten / geachtete wordenn / und die resignatio keinenn vorgang gewinnen. / Wir wissenn auch das der her marienburgische woiwod / widderum von hofe zurucke kommen / was der von zeitungenn mitbracht / werden nu sunder czweifel Ewer Herlichkeit sein angezeigt worden / bei uns ist nichts / wo wir hernocher etzwas durch unsernn ohemen bokommen / lassen wir derselbenn nebem dem vorigenn wissenn. Der fal Ewer Herlichkeit tochter kindter / und hernn Magousky kranckheit ist uns fast mitleidlich gewest aus Ewer Herlichkeit schreiben zuvornemen die sich dennoch deshalbenn nicht zuhart bokummeren wolte / sunder dis thuend dem almechtigenn Got / der genantem Magousky sein swacheit wandel und Ewer Herlichkeit in langer gesuntheit erhalte / bouolenn.

Datum aus unserm schloss Heilsberg den XXVII Augusti M D XLVIII