» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #3549

Mauritius FERBER to Ioannes DANTISCUS
Heilsberg (Lidzbark Warmiński), 1532-11-29


Manuscript sources:
1fair copy in Latin, in secretary's hand, BCz, 1595, p. 461-462
2office copy in Latin, AAWO, AB, A 1, No. 793, f. 348v

Auxiliary sources:
1register in Polish, 20th-century, B. PAU-PAN, 8247 (TK 9), f. 173

Prints:
1AT 14 No. 526, p. 804-805 (in extenso; Polish register)

 

Text & apparatus & commentaryPlain textText & commentaryText & apparatus

 

Reverendissimo in Christo Patri et Domino, domino Ioanni Dei gratia episcopo Culmensi, fratri et amico honorando

Reverendissime in Christo Pater et Domine, frater et amice honorande. Salutem et felicitatem.

Ex litteris Reverendissimae Dominationis Vestrae mihi admodum gratis intelligo eandem velle certiorem reddi, quibus modis et per quos exactores ea contributio novissime instituta exigi debeat etc. Inde est, quod scire velim Reverendissimam Dominationem Vestram, quod cum superioribus annis regia maiestas Gedani esset, exactores etiam in episcopatu meo ad contributionem tunc decretam constitutos fuisse, verum cum in episcopatum redirem, reddebar a subditis meis certior ab antiquo non exactores, sed episcopos huiusmodi contributiones exigere et exactas in thesaurum regium inferre consuevisse. Scripsi ergo regiae maiestati orans, ne me minoris fidei faceret, quam antecessores mei fuerant, sed in exigenda contributione officio meo fungi permitteret. Et quod volebam, obtinui et ita hodie in ista quoque contributione exigenda servabo. Nam plures esse collectores non est in rem regiae maiestatis, quotquot enim sunt collectores, tot esse impensas necessum est. In episcopatu quoque Culmensi, nunc Reverendissimae Dominationis Vestrae, tunc erant statuti exactores, quod reverendissimus dominus Ioannes praecessor Reverendissimae Dominationis Vestrae iniquum censens, etiam a regia maiestate, ut ipse in episcopatu suo colligeret et collecta thesauro inferret, obtinuit. Id quod et Reverendissimam Dominationem Vestram facile obtenturam non dubito. Formulam autem contributionis hoc anno decretae ex scheda indita (si modo eam non habet) plane cognoscet Reverendissima Dominatio Vestra. Quam diligenter, ut in Grudentinum proximum conventum ire non abstineat, rogo. Nam ego variis languoribus impeditus in ipsum me conferre hoc potissimum brumali tempore nequaquam possum. Est autem et locus Dominationi Vestrae Reverendissimae multo quam mihi propinquior. Quod superest, Reverendissimam Dominationem Vestram ut Christus quam diutissime sospitem et salvam conservet, opto.

Ex Heilsberg, in vigilia Sancti Andreae apostoli anno MDXXXII.

Mauritius Dei gratia episcopus Warmiensis