Reverendissimo in Christo Patri et Domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo Pater et Domine, frater et amice carissime ac plurimum honorando.

Salutem et omnem felicitatem cum mei ex animo commendatione.

Redditae mihi sunt per nuntium Reverendissimae Dominationis Vestrae litterae eius humanissimae et sinceri erga me, immo mutui inter nos, amoris testes. Omnium primum ago Reverendissimae Dominationi Vestrae gratias plurimas, quod me et sententiae suae et rerum Gedani gestarum nec non et novitatum quarundam participem fecit.

Ceterum quod ad res communis patriae bene statuendas attinet et quod ab omnibus statibus et ordinibus, si quid recte confici debeat, conveniendum esse putem, iam sententiam meam Reverendisimae Dominationi Vestrae perscripsi, in qua et persevero. Locum autem conventus futuri serenissimae regiae maiestati designavi Elbingum idque propter meam adversam atque adeo variam valetudinem. In arbitrio tamen est eius maiestatis facere, quod illi libet. De tempore vero nihil certi statui potest, quantum tamen conicere licet et Reverendissima Dominatio Vestra sentit, tam brevi tempore nequit fieri et fortasse vix ante natalem Ioannis Baptistae aut festum divi Iacobi apostoli.

De querelis coctionis cerevisiae ac aliis difficultatibus in nullo non conventu aures nostrae obtunduntur. Ceterum dominos palatinos et capitaneos quosdam in culpa esse, quis non videt? Qui conniventibus ferme oculis haec omnia pertranseuntes in transgressores non animadvertunt, sibi plus quaerentes commodare quam communi rei publicae consulere etc.

De obligatione sua ob extraditionem pecuniae dispensatori regis Daniae factam magnificus dominus Marienburgensis palatinus etiam mihi scripsit. Cui in eum effectum respondi, quod videatur mihi convenientius atque etiam maioris auctoritatis domino thesaurario ex pleno dominorum consiliariorum consessu de extradenda pecunia facultatem dari, quam singulatim per privatas personas. Si tamen non ita quieverit dominus thesaurarius et dominus palatinus postulaverit, huiusmodi consensum pro mea persona dare non recusabo.

De gentilibus nostris Gedanensibus iamdudum id vereor, quod Dominatio Vestra Reverendissima nunc praesagire videtur. Utinam simus non veri vates et utinam saperent et intelligerent ac novissima providerent, ne quod veremur et eorum luxus ac superbia (ne dicam apostasia) meretur, illis accidat nobisque dolendi communem patriam nulla praebeatur occasio. Interea orabimus cum Christo pro illis ad Patrem, ut ignoscat eis, quia nesciunt, quid faciunt.

De ceteris, cum talia sint pleraque omnia, quae litteris vel comprehendi, vel confici nequeant, in communem conventum aut particularem quempiam congressum nostrum supersedendum esse visum est mihi iuxta atque Reverendissimae Dominationi Vestrae.

Nova, quae scriptu digna essent, quaeque Reverendissima Dominatio Vestra ignorare posset, apud me ad praesens non sunt. Unum, quod reliquum est, Reverendissimam Dominationem Vestram salvam et florentem esse, laetamque vivere, ex animo opto et cupio me illius fraterno amori ac benevolentiae commendando.

Ex Heilsberg, 4 Maii anno MDXXXV.

Reverendissimae Dominationis Vestrae totus Mauritius episcopus Varmiensis manu sua