Reverendissimo in Christo Patri ac Domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo Pater et Domine.

Salutem et omnis felicitatis augmentum.

Litteras Reverendissimae Dominationis Vestrae cum praesente puero accepissem gratias agens, quod me tam ferventi animo ac fraterno amore invisere dignata sit, vicissim eidem Vestrae Reverendissimae Dominationi longaevam incolumemque vitam et cuncta felicia faustaque orans optansque.

In novis custos ecclesiae meae nuper mihi significat ipsi a domino Kiofski e Cracovia scriptum esse caesarem Thurcarum penitus regem PersarumSophi e cunctis dominiis item et regno cum possesionibus eiecisse contriuisseque. Reor hanc famam, si vera non sit, ab Ungaris ad consternendum Ferdinandum regem processisse. Item scribit Cracoviensem praesulem in sua valetudine non recte valere, ipsius vita, nisi divino miraculo favente respir<a>rit, parvo tempore, ut phicisi praesagiunt, in eo fixa esse non poterit. Deus servet illum et ad bonam valetudinem respirare faciat, precamur.

In Monte Regio et Gd<a>no multa mussitantur de Lubicensium augmento et novissima in mari obtenta victoria, arbitror, ab iis, qui principum fortunam pessum iri cupiant. Elbogen tamen, id est Cubitum, in deditionem electi regis venisse constans fama est, non tamen certa omnibus.

Haec scripsi praestolans reditum pueri Reverendissimae Dominationis Vestrae eo me ..., ne mora eum tardaret, sed responso accepto ilico iter suum continuaret. Interea heri supervenit puer meus affer[ens] litteras regias et aliorum ad dominos consilia[rios], Reverendissimam Dominationem Vestram et me communiter et sigillatim intitulatas. Quas mitto cum exemplaribus, de quibus originales penes me retineo et, quod litteris non percallebit, e nuntio didicet. Eapropter etiam ipsum mitto.

His me consueto fraterno am[ori] et favori Reverendissimae Dominationis Vestrae diligentissimum commendo.

Ex castro Helsberg, 23 Novembris 1535.