Letter #3640
Felix REICH to Ioannes DANTISCUSFrauenburg (Frombork), 1538-04-15
| received [1538]-04-17 Manuscript sources:
| ||||
Text & apparatus & commentaryPlain textText & commentaryText & apparatus
Reverendissimo in Christo Patri et Domino, domino Iohanni Dei gratia episcopo Warmiensi, domino meo clementissimo
Post obsequiorum meorum commendationem.
Reverendissime in Christo Pater et Domine, domine clementisime.
Quanto maerore me, immo totum collegium hic nostrum, tam repentina et insperata Reverendissimae Dominationis Vestrae aegritudo perculit, tanto vicissim nos gaudio exhilaravit optata incolumitatis restitutio. De qua ex litteris Reverendissimae Dominationis Vestrae ad reverendissimum dominum Culmensem datis certiores redditi sumus. Comprecandus nobis Deus est, ut vires, quas vehemens morbi vis attriverat, divina clementia restauret ac indies corroboret, et Reverendissimam Dominationem Vestram nobis diu servet, ne mox rursum desideremus, quem vixdum sensimus nobis obtigisse pontificem.
Ceterum, ex quo festivitates divorum Georgii, Adalberti et Marci in hebdomadam sanctam Paschae incidunt, ubi celebrari nequeunt, et breviaria Warmiensia in titulo de translatione festorum satis dilucide disponunt, ut in ferias proximas post octavas Paschae vacantes transferantur, etsi plura fuerint per ferias alio festo vacantes, eo ordine, quo intermissa fuerint, suppleantur. Oboriri tamen nihilominus nonnullis dubium potest, ut antea quoque factum fuisse compertum habetur, an festum sanctorum Philippi et Iacobi, quod ordinem continuationis celebrandi alia festa interrumpit, a suo proprio loco dimoveri ac festo sancti Marci cedere ac in feriam quintam transferri debeat, an non.
Ut igitur consors observantia in diocesi Reverendissimae Dominationis Vestrae ubique sit, videtur venerabili capitulo, ut Reverendissima Dominatio Vestra litteras, quas processum vocant, ad omnes archipresbyteriales sedes in tempore consueto more mitti iubeat et omnibus suae iurisdictionis mandet, ut iuxta praedictae notulae ordinationem festivitates praedictas observent, nominatimque in litteris exprimatur, ut dies Sancti Georgii feria secunda post Dominicam Quasimodogeniti, feria tertia - Adalberti, feria quarta - Philippi et Iacobi in suo loco, demum divi Marci feria quinta proxima celebrentur.
Litterae vero Dominationis Vestrae Reverendissimae facile perferentur per eos, qui chrisma istinc ad singulas sedes sunt percepturi archipresbyteris Elbingensis, Melsacensis, Frawenburgensis et Tolkemitensis. Ego hinc rem et voluntatem Reverendissimae Dominationis Vestrae denuntiabo, quandoquidem hanc ordinationem, seu potius veteris ordinationis declarationem, eam probaturam non ambigo.
Christus Reverendissimae Dominationi Vestrae integram valetudinem clementer restituere nobisque eam diu incolumem servare dignetur.
Ex Frawenburg, XV Aprilis anno 1538.
Eiusdem Reverendissimae Dominationis Vestrae humilis capellanus Felix Reich
Postscript No. 1:
Et ne notarius in dictandis litteris laboret, exemplar his inditum mitto.
Postscript No. 2:
Reverendissime Domine.
Non dubito mulierem illam, quae cingulum repetit, Dominationem Vestram Reverendissimam, cum Braunsbergum venerit, interpellaturam. Et quia dominus Paulus Snopec, antiquus oeconomus, quem semper eadem mulier in testem producere nititur, istinc migraturus est, conduceret fortassis eum ante abitionem a Dominatione Vestra Reverendissima examinari et schedam istam, de manu olim domini Mauricii ad cingulum repositam, Braunsbergum adferri, ut tandem aliquando causa haec discuti et terminari possit.