Reverendissimo in C <h> risto domino et domino Iohanni Dantisco, Dei gratia episcopo C[ul]mensi se[renissimi] [Sigis]mundi r[egis] secre[tario] ...dig[nissimo]

Hochwirdiger unnd Genediger Her.

Ich hab Ewer Genode dy briffe, ßo balde ich keyn Andorff quam, mit eynem bothenn gesant, welhem ich gebenn hab 12 stuwn unnd / hab Ewernn Genode dy briffe keyn Brüke geßant, / unnd hab ym beffellenn, her sulde mit ffleiß nach Ewernn Genode ffragen, unnd nymant sulde dy briffe geben, den Ewer Genode. / Alzo hot myr dy briffe wider brocht, / dornach hab ych eynen andernn bothenn mit den briffe keyn Brussell geschykt, hot myr ouch alzo vider bracht / unnd künde niht derffaren, recht vo Ewer Genode ver / biß daß disser Stenczell keyn Andorff kumen ist, / unnd hot myr von Ewer Genode gesagt, daß Ewer Genode czu Bruke, ader czu Genntt ist. / Szo schyke ich Ewer Genode dy briffe czußamen gebünden, den eyn von kynigin von Pollen yr genode, den andernn von krokeschen herrnn, unnd ouch von andernn herschofft, / unnd ouch eyn briff, den ich an Ewer Genode geschrybenn hab, balde alz ich keyn Andorff kumen bin. Ewer Genode sol voll auß meynen briffe vornemen meyn bytte unnd begere an Ewer Genode zu moll, vaß dy czebell angehett, bytte Ewer Genode ummb eyn entffertt.

Ouch, Genediger Her, disser Stenczell, der Ewer Herschafft dyner, gevest ist, hot myr gesagt, daß her kegen Ewer Genode unnd Ewernn Herschafft bruder eczwas gethon ßal habenn, daß her niht bilich thuen sulde, / daß her yczunt hoch klagt unnd bekentt, / unnd hot mich mit venende ognn gebethenn, ich ßulde Ewer Genode byttenn, volt yn denn czornn / unnd ßeyne unvornufft vorgebenn . Alzo ist an Ewer Genode meyn ffleysige unnd hoch bette, szo her an Ewer Genode mit meynen briffe quem, Ewer Genode volt ym daß ummb Gocz wil vorgebenn unnd ummb nye demütige bette unnd volt yn zu genode vyder annemen, den der armer geselle kan dy sprohe niht unnd veß niht, vy her ßal zu daß Pollen landt kumen. Ewer Genode vyrtt derffur den lonn von Gotte entffangenn unnd von ffrunden lewthen den lob unnd ich vil kegen Ewer Genode alz kegenn meynen herrenn alleczeyt viliklihen noch meyne hechsten vormügen vordinen.

Domit ich mich yn Ewer Genode vil beffollenn habenn.

Datum eyllent, am 26 Iulliüs anno 1531.

Ewer Genode williger diner Stanislaus Czypser manu propria