Hern Zcemenn

Unsernn. /

Hie bey schicke wir Ewer Herrlichkeit / von uns besigel[t] und underschribenn, / wie die begert, / den briff ann konigliche majestet, unsern allergnedigsten hern, gestelt. Weil aber uns dis mol gen de[r] Lobau kein bot vorgekomenn / und dis schreiben eilents bey unsermm bruder, / der noch Danczk sich begebnn, an Ewer Herrlichkeit mitgethon, / ist unser freuntlich bitt, wolde solchen briff an die andrenn hern lossen gelangen, / s[o] der gefellig / oder ouch in ein ander formm gestalt widerumb underschribenn und besigelt an uns wirt komenn, / wollen wir in unbesvert mit andrem unsermm schreiben zur sachen notig / an koniglichen hoff fertigenn. / Was Dennemarken, / Hollander etc. betrifft, / wirt zcwischen uns nicht wenig sein zu beredenn, / welchs wir / biss uff unser zusammekome[nn], wie wir uns vorsehen im korczenn / mit gotlicher hu[lf] geschen mag, / berwhenn lossenn / und Ewer Herrlichkeit mit al denn iren gotlichnn gnadenn befhelenn. /

Datum aus unserm slosse Heilsbe[rg], den IIII Augusti M D XLII.