Unsern freuntlichnn grues / mit alles guttnn entpitten zuvorann. / Ersame, nhamhafftige hern, bsundere gutte freunde. /

Ewer Erbarkeit schreibenn hab wir nechth spath erhalten. / Was den ehebrecher und wie der sunst vonn {von} Ewer Erbarkeit genent , belangt, / wolle wir sein ubeltath, so die der gestalt , wie durch Ewer Erbarkeit geschriben, / nicht entschuldigen, / das aber dar bey angeczeigt habnn, / das des beschedigten weib / zuvor ouch in solchemm wesen befunden / und noch gemeinem geruchte mit seynemm wissen und zu losz / ouch nochgelossne und vorloffne kleider und tasschen, wie vylen unnd stad kundig, / widergebnn etc. Dieweil aber disser fhal sich so zugetragen, / das disser gefangner aus des closters geistlichnn freyheit, die in unsernn gesitlichnn rechten wol bewisen, gedrungen / und do im closter das jenige, / wie Ewer Erbarkeit wol wissenn, geschen, / ist unsermm ampt und pflicht noch, / solchs nicht zu ubersehen / und das gutter veterlicher meynung do bey gethon / ane grosse herthe drewunge, wie Ewrer Erbarkeit schriffte lautenn, / das wir von Gots und rechts wegenn schuldig, / dar noch sich Ewer Erbarkeit bey unsermm vicario und official zu Colmeshe werden wissenn zu haldenn. Wie bey Ewrer Erbrakeit die tagfart ist angestelt, wolde wir gernn bericht sein, / und ab auch andrenn des lands stenden solchs angekundt. / Die confirmacion des lands privilegien hab wir negst in der eil bey Euch zu lossen vorgessen, / welche wir mit der abschrifft des andren brives under Ewer Erbarkeit sigel in negstkunfftiger tagfart zu gewonlicher stelle wollen bringenn. Ewer Erbarkeit hie mit Gothe befholenn. /

Datum aus unsermm slosse Lobau, den XII Aprilis M D XXXVII.